Довталабони иҷозатномаи «PRO» оид ба футбол таҷрибаомӯзиро дар дастаи миллии Тоҷикистон анҷом доданд

ДУШАНБЕ, 20.10.2025 /АМИТ «Ховар»/. Дар Тоҷикистон даври омӯзишии мураббигии «Pro», ки сатҳи баландтарин дар таълими мураббигӣ мебошад, ба анҷом расид.

Тавре ба АМИТ «Ховар» аз Федератсияи футболи Тоҷикистон хабар доданд, довталабон аз 9 то 14 октябр дар ҳайати дастаи мунтахаби Тоҷикистон таҷриба омӯхтанд. Дар ҷараёни таҷрибаомӯзӣ онҳо имкон пайдо карданд, ки на танҳо бо раванди тамрини тими миллии мамлакат  шинос шаванд, балки кори ҳайати мураббиёнро ҳангоми омодагӣ ба бозиҳои расмӣ мушоҳида кунанд.

Давраи таҷрибаомӯзӣ бо ду бозии тими миллии Тоҷикистон ба муқобили дастаи яккачини Малдив дар марҳилаи интихобии Ҷоми Осиё-2027 (2:0 ва 3:0) рост омад. Бозии аввал 9 октябр дар Ҳисор ва бозии дуюм 14 октябр дар Мале баргузор шуд.

Акнун, пас аз анҷоми марҳилаи амалӣ довталабон имтиҳони охиринро, ки моҳи ноябр баргузор мешавад, месупоранд.

АКС: Федератсияи футболи Тоҷикистон