Холид Ал-Фолеҳ: «Арабистони Саудӣ дар Тоҷикистон беш аз 14 лоиҳаро тавассути Фонди саудии рушд амалӣ намудааст»

ДУШАНБЕ, 14.10.2025 /АМИТ «Ховар»/. Имрӯз, 14 октябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон Вазири сармоягузории Подшоҳии Арабистони Саудӣ Холид Ал-Фолеҳро ба ҳузур пазируфтанд.

Пас аз мулоқот Вазири сармоягузории Подшоҳии Арабистони Саудӣ дар изҳороти худ барои рӯзноманигорон иброз намуд, ки ҳайати сатҳи баланди Арабистони Саудӣ, ки аз намояндагони бахшҳои давлатӣ ва хусусӣ иборат аст, ба Ҷумҳурии Тоҷикистон омада, дар Форуми байналмилалии сармоягузории «Dushanbe Invest – 2025» иштирок дорад.

«Арабистони Саудӣ ифтихор дорад, ки аз аввалин давлатҳое мебошад, ки истиқлолияти Ҷумҳурии Тоҷикистонро эътироф намудааст ва аз ҳамон замон то имрӯз дар татбиқи барномаҳои рушд ва пешрафти ин давлат шарики фаъол боқӣ мемонад», — изҳор дошт Холид Ал-Фолеҳ.

Ба андешаи ӯ, Шоҳигарии Арабистони Саудӣ аз замони истиқлолияти Тоҷикистон то имрӯз тавассути Фонди саудии рушд дар беш аз 14 лоиҳа бо арзиши зиёда аз 300 миллион доллари амрикоӣ саҳм гузоштааст. Ба ғайр аз ин ҳамкорӣ бо Гурӯҳи ҳамоҳангсозии кишварҳои арабӣ, Бонки исломии рушд ва дигар муассисаҳои молиявӣ низ идома дорад.

Вазир таъкид намуд, ки яке аз муҳимтарин лоиҳаҳои муштарак — Неругоҳи барқи обии «Роғун» мебошад, ки бо ташаббуси Пешвои миллат муҳтарам Эмомалӣ Раҳмон амалӣ гардида, ҳамчун рамзи бузурги пешрафт ва худшиносии давлати Тоҷикистон дар таърих боқӣ мемонад.

Холид Ал-Фолеҳ ҳамзамон гуфт, ҳайати Арабистони Саудӣ, ки намояндагони бахши хусусиро низ дар бар мегирад, дар ҷаласаи навбатии Комиссияи муштараки байниҳукуматии Тоҷикистону Арабистони Саудӣ иштирок менамояд. Ҳамчунин Шурои соҳибкории Тоҷикистону Арабистони Саудӣ, ки соли 2024 таъсис ёфтааст, ҷаласаи дуюми худро баргузор мекунад.

«Дар натиҷаи сафарҳои мунтазам ба Тоҷикистон якчанд лоиҳаҳои бахши хусусии Арабистони Саудӣ дар соҳаҳои муҳими иқтисодӣ ва ояндадор, аз ҷумла энергияи барқароршаванда, амволи ғайриманқул ва сайёҳӣ ба роҳ монда шудаанд. Мо умед дорем, ки бо шиносоии бештари имконияти сармоягузорӣ тавассути чунин форумҳо ҳаҷми ҳамкории иқтисодӣ ва сармоягузорӣ боз ҳам афзоиш меёбад», — изҳор дошт вазир.

Холид Ал-Фолеҳ гуфт, ки «Арабистони Саудӣ ба рушди савдои дуҷониба ва воридоти маҳсулоти кишоварзӣ ва маъданӣ аз Тоҷикистон таваҷҷуҳи зиёд дорад. Ширкатҳои пешрафтаи саудӣ, аз ҷумла ACWA Power, ки ҳайатро ҳамроҳӣ мекунанд, дар татбиқи лоиҳаҳои энергияи «сабз» ва содироти он аз Тоҷикистон ба кишварҳои Осиёи Ҷанубӣ, Марказӣ ва минбаъд ба Аврупо нақши муҳим доранд».

АКС: АМИТ «Ховар»