Имрӯз дастаи «Истиқлол» бо тими «Гоа»-и Ҳиндустон дар Лигаи дуюми чемпионҳои КФО-2025/26 бозӣ мекунад

ДУШАНБЕ, 01.10.2025 /АМИТ «Ховар»/. Чемпиони Тоҷикистон оид ба футбол байни  дастаҳои Лигаи олӣ- дастаи футболи «Истиқлол»-и Душанбе имрӯз, 1 октябр нахустин бозии хонагии худро дар даври гурӯҳии Лигаи дуюми чемпионҳои  Конфедератсияи футболи Осиё (КФО) дар мавсими 2025/26 баргузор менамояд.

Тавре ба АМИТ «Ховар» аз Федератсияи футболи Тоҷикистон иттилоъ доданд, дастаи «Истиқлол» бо тими «Гоа» дар Варзишгоҳи марказии шаҳри Ҳисор бозӣ мекунад. Оғози бозӣ соати 18:45 ба вақти Душанбе мебошад.

«Истиқлол» дар гурӯҳи «D»-и минтақаи Ғарб бозӣ мекунад, ки рақибони он дастаҳои «Ал-Наср» (Арабистони Саудӣ), «Ал-Завроа» (Ироқ) ва «Гоа» (Ҳиндустон) мебошанд.

Бар асоси низомномаи мусобиқа, ду дастаи беҳтарини гурӯҳ ба даври плей-офф роҳ меёбанд.

АКС: Федератсияи футболи Тоҷикистон