Масъалаи пайваст намудани муассисаҳои таълимии Тоҷикистон ба интернет баррасӣ шуд

ДУШАНБЕ, 24.10.2025. /АМИТ «Ховар»/. Масъалаи мусоидат ба рушди иқтисоди рақамӣ ва пайваст намудани ҳар муассисаи таълимии Ҷумҳурии Тоҷикистон ба интернет ва татбиқи амалии ташаббуси «GIGA» дар мамлакат 23 октябр зимни вохӯрии Сардори Хадамоти алоқаи назди Ҳукумати Ҷумҳурии Тоҷикистон Исфандиёри Саъдулло бо ҳайати Хазинаи кӯдакони Созмони Милали Муттаҳид (UNICEF) таҳти роҳбарии ҳаммуассис ва ҳамраиси ташаббуси «GIGA» Кристофер Фабиан баррасӣ гардид. Дар ин хусус ба АМИТ «Ховар» аз ин хадамот хабар доданд.

Аз ҷониби шарикони рушд иттилоъ дода шуд, ки бо ташаббуси муштараки Хазинаи кӯдакони Созмони Милали Муттаҳид (UNICEF) ва Иттиҳоди байналмилалии телекоммуникатсия (ITU) то имрӯз харитаи ҷойгиршавии мактабҳоро дар 142 кишвари ҷаҳон таҳия намудаанд.

Иброз гардид, ки дар доираи эълони Солҳои рушди иқтисоди рақамӣ ва инноватсия (2025–2030) дар Тоҷикистон ин ташаббус ҳамчун барномаи амалӣ дар мамлакат татбиқ мегардад. Мақсадҳои он ба пешбурди ҳадафҳои стратегии мамлакат ва рушди соҳаҳои иқтисоди рақамӣ ва инноватсионӣ метавонанд мусоидат кунанд.

Ҷонибҳо ба мувофиқа расиданд, ки барои амилӣ гардонидани ин ташаббус муколамаи мунтазамро идома диҳанд.

АКС: Хадамоти алоқаи назди Ҳукумати Ҷумҳурии Тоҷикистон