Оид ба нақши Донишгоҳи давлатии Кӯлоб дар рушди илм ва маориф конфронси ҷумҳуриявӣ доир шуд

ДУШАНБЕ, 26.10.2025. /АМИТ «Ховар»/. 24 октябр дар шаҳри Кӯлоб таҳти унвони «Нақши Донишгоҳи давлатии Кӯлоб ба номи Абуабдуллоҳи Рӯдакӣ дар рушди илм ва маориф» конфронси ҷумҳуриявии илмӣ-назариявӣ доир гардид.

Тавре ба АМИТ «Ховар» аз ин донишгоҳ хабар доданд, дар конфронс намояндагони аҳли илму адаб, олимону донишмандон, ходимони давлатӣ ва ҷамъиятӣ, собиқадорон, устодону омӯзгорон ва собиқ хатмкардагони донишгоҳ иштирок намуданд.

Таъкид карда шуд, ки Донишгоҳи давлатии Кӯлоб ба номи Абуабдуллоҳи Рӯдакӣ дар замони гузашта ва имрӯз дар рушду таҳкими неруи зеҳнӣ, тарбияи кадрҳои болаёқат ва таҳкими худшиносии миллӣ нақши таърихӣ дошта, ҳамчун рамзи устувори фарҳангу дониш дар кишвар шинохта мешавад.

Тазаккур дода шуд, ки дар солҳои соҳибистиқлолӣ донишгоҳ бо шарофати сиёсати хирадмандонаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба марҳилаи нав ворид гардид.

«Имрӯз донишгоҳ ҳамчун муассисаи муътабари таҳсилоти олӣ бо инфрасохтори муосир, муҳити илмиву омӯзишӣ ва дастовардҳои назаррас, дар хидмати таълиму тарбияи насли соҳибмаърифат қарор дорад», — изҳор гардид дар конфронс.

Гуфта шуд, ки Донишгоҳи давлатии Кӯлоб на танҳо мақоми илмии худро устувор намуд, балки бо густариши ҳамкории байналмилалӣ ва таҳкими низоми таҳсилот ҳамчун маркази муосири омӯзишиву пажуҳишӣ шинохта мешавад.

Дар фарҷом ба як зумра иштирокчиён нишони «Ифтихори донишгоҳ» супорида шуд.

АКС: Донишгоҳи давлатии Кӯлоб ба номи Абуабдуллоҳи Рӯдакӣ