То соли 2030 фаъолияти электросамокатҳо ва электроскутерҳо дар роҳҳои автомобилгарди Душанбе манъ мегардад

ДУШАНБЕ, 07.10.2025. /АМИТ «Ховар»/. Дар асоси қарори Маҷлиси вакилони халқи шаҳри Душанбе фаъолияти электросамокатҳо, электроскутерҳо ва дигар воситаҳои сайёри инфиродӣ (ба истиснои воситаҳои инфиродии ба қайди давлатӣ гирифташуда) дар роҳҳои мошингард ва пиёдагарди ҳудуди шаҳри Душанбе, ба ғайр аз ҷойҳои махсуси муайяншуда то соли 2030 муваққатан манъ карда мешавад. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии шаҳри Душанбе хабар медиҳад.

Ин тадбир бо мақсади танзими фаъолияти бенизоми электросамокатҳо ва электроскутерҳо, коҳиши садамаҳои роҳу нақлиётӣ бо иштироки онҳо, пешгирии халал ба ҳаракати муътадили нақлиёт ва пиёдагардон, инчунин ҳифзи ҳуқуқу манфиатҳои истифодабарандагони роҳҳои автомобилгард қабул гардидааст. Татбиқи ин тасмим то фароҳам овардани шароити зарурии инфрасохторӣ идома хоҳад ёфт.

Дар ин замина аз шаҳрвандон, хусусан волидони ноболиғон эҳтиромона хоҳиш карда мешавад, ки фарзандонро бе назорат нагузоранд ва аз истифодаи воситаҳои манъшуда худдорӣ намоянд.

Тавре қаблан иттилоъ додем, аз 15 то 25 сентябр дар шаҳри Душанбе амалиёти шартии «Тасмаи бехатарӣ» ва «Скутер» гузаронида шуд. Дар доираи ин амалиёт нисбат ба 1250 нафар барои истифода накардани тасмаи бехатарӣ ва нисбат ба 60 ронандаи дучарха ва скутер бо моддаи 333-и Кодекси ҳуқуқвайронкунии Ҷумҳурии Тоҷикистон санадҳои маъмурӣ тартиб дода шуданд.

АКС аз манбаъҳои боз