10 нафар омӯзгор ва донишҷӯйи Донишгоҳи техникӣ дар Озмуни ҷумҳуриявии «Илм – фурӯғи маърифат» соҳиби ҷойҳои намоён гардиданд

ДУШАНБЕ, 09.11.2025 /АМИТ «Ховар»/. 10 нафар омӯзгор ва донишҷӯйи Донишгоҳи техникии Тоҷикистон ба номи академик Муҳаммад Осимӣ дар Озмуни ҷумҳуриявии «Илм – фурӯғи маърифат» соҳиби ҷойҳои намоён гардиданд.

Тавре ба АМИТ «Ховар» аз ин донишгоҳ хабар доданд, 1 нафар дар номинатсияи «Зеҳни сунъӣ ва барномасозӣ» ҷойи якум, 2 нафар дар номинатсияҳои «Математика» ва «Ихтироъкорӣ ва навоварӣ» ҷойи дуюм ва 7 нафар дар номинатсияҳои «Зеҳни сунъӣ ва барномасозӣ», «Ихтироъкорӣ ва навоварӣ» ва «Физика ва астрономия» соҳиби ҷойи сеюм гардиданд.

Бояд гуфт, ки дар маҷмӯъ аз донишгоҳ дар озмун зиёда аз 400  нафар иштирок намуданд. Дар даври ниҳоии озмун, ки  аз 21 то 25 октябр баргузор шуд, 13 нафар иштирокчӣ ба ин марҳила роҳ ёфтанд, ки аз онҳо 10 нафар дар номинатсияҳои гуногун соҳиби ҷойҳои ифтихорӣ гардиданд.

Ба таъкиди масъулини донишгоҳ, ин дастовард натиҷаи меҳнату заҳмати софдилонаи омӯзгорону донишҷӯён буда, дар таърихи иштироки Донишгоҳи техникии Тоҷикистон дар озмун як саҳифаи нави ифтихорро боз намуд. Байни устодони ғолиб 4 нафар намояндаи факултетҳои гуногун буданд, ки бо дониш, навоварӣ ва таҳқиқоти илмии худ саҳми арзанда гузоштанд.

Натиҷаи бадастомадаи донишҷӯён ва устодони Донишгоҳи техникии Тоҷикистонро метавон натиҷаи таърихӣ арзёбӣ намуд, зеро он на танҳо сатҳи баланди омодагии иштирокчиёнро нишон дод, балки нуфузи донишгоҳро дар фазои илмиву маърифатии ҷумҳурӣ боз ҳам таҳким бахшид.

Бо ифтихор ва эҳтиром, омӯзгорон ва донишҷӯёни Донишгоҳи техникӣ изҳори миннатдорӣ ба Президенти Ҷумҳурии Тоҷикистон муҳтарам Эмомалӣ Раҳмон менамоянд, ки бо ташаббуси бевоситаашон Озмуни ҷумҳуриявии «Илм – фурӯғи маърифат»-ро ташкил ва баргузор намуда, сатҳи илмӣ ва маърифатии насли наврас ва донишҷӯёнро тақвият мебахшанд.

АКС: Донишгоҳи техникии Тоҷикистон ба номи академик Муҳаммад Осимӣ