4 монографияи муштараки олимони Тоҷикистон ва Чин муаррифӣ гардид

ДУШАНБЕ, 16.11.2025 /АМИТ «Ховар»/. 13 ноябр дар Институти масъалаҳои об, гидроэнергетика ва экологияи Академияи миллии илмҳои Тоҷикистон машварат баргузор шуд, ки дар он нашри 4 монографияи муштараки олимони Тоҷикистон ва Чин муаррифӣ гардид. Дар ин хусус ба АМИТ «Ховар» аз Академияи миллии илмҳои Тоҷикистон хабар доданд.

Зимни машварати илмӣ  президенти Академияи миллии илмҳои Тоҷикистон Қобилҷон Хушвахтзода изҳор дошт, ки ба табъ расидани нашри чор монографияи байналмилалии дастҷамъона, ки аз ҷониби олимони тоҷик бо ҳамкории ҳамтоёнашон аз Ҷумҳурии Мардумии Чин таҳия шудаанд, барои Соли байналмиллалии ҳифзи пиряхҳо (2025) аҳамияти калон дорад.

Иброз гардид, ки аввалин монография ба таҳлили равандҳо, омилҳо ва механизмҳои таъминкунандаи рушди устувори иҷтимоию иқтисодии Тоҷикистон бахшида шуда, монографияи дуюм хатарҳои экзогеодинамикӣ ва таъсири селу ярчҳо дар шароити табиии Тоҷикистонро баррасӣ мекунад. Монографияи сеюм ҳолат, мушкилот ва дурнамои захираҳои оби Тоҷикистонро аз дидгоҳи гидрологӣ, лимнологӣ, глятсиологию экологӣ ва монографияи чорум пиряхҳои Тоҷикистон, ҳолати муосир, динамика ва равандҳои тағйирёбии онҳоро бо хусусияти иқлимӣ ва морфологӣ таҳлил менамояд.

«Ин нашрияҳо натиҷаи ҳамкории пурсамари олимони ду ҷумҳурӣ буда, барои таҳкими муносибатҳои илмӣ ва пешбурди таҳқиқот дар соҳаҳои об, гидроэнергетика, экология ва ҳифзи пиряхҳо аҳамияти стратегӣ доранд», -иброз гардид дар машварат.

Дар машварат директори Институти экология ва ҷуғрофияи Шинҷони Академияи илмҳои Чин Юанмин Чжан изҳор намуд, ки  нашри чор монографияи муштараки илмию таҳқиқотӣ натиҷаи заҳмати пайвастаи олимони ҳарду ҷумҳурӣ мебошад. Он барои рушди донишҳои нав, лоиҳаҳои муштараки илмӣ ва омӯзиши мушкилоти глобалии муҳити зист заминаи мустаҳкам фароҳам меорад.

Таъкид гардид, ки ҳар як монография нишондиҳандаи сатҳи баланди касбӣ, таҳлили амиқ ва ҷаҳонбинии васеи муаллифон мебошад.

АКС: Академияи миллии илмҳои Тоҷикистон