Ҳайати дастаи футболи «Ал-Наср»-и Арабистони Саудӣ барои бозӣ бо «Истиқлол» ба Душанбе омад

ДУШАНБЕ, 25.11.2025 /АМИТ «Ховар»/. 24 ноябр ҳайати дастаи футболи «Ал-Наср»-и Арабистони Саудӣ барои бозӣ бо тими футболи «Истиқлол»-и Тоҷикистон дар даври панҷуми марҳилаи гурӯҳии Лигаи чемпионҳои 2-и Осиё ба шаҳри Душанбе омад. Дар ин хусус АМИТ «Ховар» бо истинод ба Федератсияи футболи Тоҷикистон хабар медиҳад.

Дар Фурудгоҳи байналмилаии шаҳри Душанбе меҳмононро намояндагони дастаи футболи «Истиқлол», хабарнигорон ва мухлисон истиқбол гирифтанд.

Бозии дастаҳои футболи «Истиқлол»-и Тоҷикистон ва «Ал-Наср»-и Арабистони Саудӣ 26 ноябр, соати 18:45 дар Варзишгоҳи марказии шаҳри Ҳисор доир мешавад.

25 ноябр бо иштироки масъулини бозӣ ҷаласа доир гардид, ки дар он масъалаҳои ташкилӣ оид ба вохӯрии дарпешистода баррасӣ шуданд. Мизбонони рақобат- футболбозони «Истиқлол» бо пироҳанҳои сурх ва дастаи футболи «Ал-Наср»-и Арабистони Саудӣ бо пироҳанҳои зард ба майдон мебароянд.

Ёдовар мешавем, ки пас аз бозиҳои даври чаҳорум дар гурӯҳи «D», дастаи футболи «Ал-Наср»-и Арабистони Саудӣ бо 12 имтиёз садрнишин буда, роҳхати марҳилаи плей-оффро ба даст овард. Дастаҳои футболи «Ал-Завра»-и Ироқ ва «Истиқлол»-и Тоҷикистон соҳиби 6 имтиёзӣ буда, мутаносибан дар зинаҳои дуюм ва сеюм мавқеъ гирифтаанд. Дастаи футболи «Гоа»-и Ҳиндустон бидуни имтиёз дар зинаи охири гурӯҳ аст.

АКС: Федератсияи футболи Тоҷикистон