Дар Академияи идоракунии давлатӣ оид ба таҷдид ва рушди фарҳанги миллӣ машварати илмӣ баргузор шуд

ДУШАНБЕ, 27.11.2025 /АМИТ «Ховар»/. 26 ноябр дар Академияи идоракунии давлатии назди Президенти Ҷумҳурии Тоҷикистон дар мавзуи  «Таҷдид ва рушди фарҳанги миллӣ дар даврони Истиқлоли давлатӣ» машварати илмӣ-назариявӣ баргузор шуд, хабар медиҳад АМИТ «Ховар» бо истинод ба академия.

Дар машварат масъалаҳои эҳёи фарҳанги миллӣ дар замони Истиқлоли давлатӣ, фарҳанги забони давлатӣ, фарҳанги меъморию шаҳрсозӣ аз давраи гузашта то замони Истиқлоли давлатӣ, санадҳои танзимкунандаи соҳаи фарҳанг, танзими ҷашну маросим ҳамчун унсури муҳими фарҳанг, нақши Пешвои миллат дар таҷдид ва рушди фарҳанги миллӣ, нақши асари «Чеҳраҳои мондагор» – и Пешвои миллат  муҳтарам Эмомалӣ Раҳмон дар худшиносии миллию фарҳангии ҷомеа ва амсоли инҳо мавриди баррасӣ қарор дода шуданд.

Зимни муколама иштирокчиён оид ба аҳамияти омӯзиши илмию амалии сиёсати фарҳангии давлатӣ дар таҳкими давлати миллӣ ва ҳифзи суботи ҷомеа ибрози андеша намуданд.

Аз ҷониби иштирокчиён барои беҳтарсозии сиёсати фарҳангӣ, густариши фаъолияти маърифатӣ-миллӣ ва таҳкими ҳувияти миллӣ дар шароити ҷаҳонишавӣ тавсияҳои илмӣ-амалӣ пешниҳод гардиданд.

АКС: Академияи идоракунии давлатии назди Президенти Ҷумҳурии Тоҷикистон