Дар ноҳияи Лахш бо усули «Деҳа ба деҳа» ва «Маҳалла ба маҳалла» суҳбату вохӯриҳо доир гардид

ДУШАНБЕ, 02.11.20025. /АМИТ«Ховар»/. Гурӯҳи кории Маркази исломшиносии назди Президенти Ҷумҳурии Тоҷикистон дар ноҳияи Лахш бо мақсади  фаҳмонидани муҳтавои қонунҳои Ҷумҳурии Тоҷикистон «Дар бораи масъулият барои таълиму тарбияи кӯдак», «Дар бораи маориф», «Дар бораи танзими ҷашну маросим дар Ҷумҳурии Тоҷикистон», «Дар бораи тарбияи ватандӯстии шаҳрвандон» бо усули «Деҳа ба деҳа» ва «Маҳалла ба маҳалла» бо сокинон суҳбату вохӯриҳо  анҷом доданд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии ноҳияи Лахш хабар медиҳад.

Дар суҳбату вохӯриҳо ҳамчунин ба масъалаҳои истифодаи самараноки замин, сарфакорона истифода бурдани неруи барқ, пешгирии пошхӯрии оилаҳои чавон ва  дар руҳияи  худшиносӣ тарбия намудани насли наврас дахл карда шуд.  Таъкид шуд, ки муҳимтарин рукни таҳкими истиқлолият ва сулҳу осоиштагӣ  маҳз ҷавонон ҳастанд, зеро онҳо бо нерӯи созандаву иқтидорманд, қувваю тавон, диду нигоҳи тоза, зиракӣ ва ақидаҳои солими хеш дар рушди ҷомеа ва ободии Ватан саҳми босазо мегузоранд.

Даъват карда шуд, ки ҷавонони ояндасозро месазад, ки дар дилу вуҷуди худ ҳама вақт фикри ояндаи миллату Ватанро дошта, бо эҳсоси меҳанпарастӣ ва худогоҳиву худшиносӣ ҳомии дастовардҳои даврони истиқлоли мамлакат ва арзишҳои неки марзу буми хеш бошанд. Ҳамзамон, ба муқобили ифротгароиву хурофотпарастӣ ва ақидаву андешаҳое, ки барои рушди мамлакат монеъ мешаванд, муборизаи беамон баранд ва ҷомеаро аз таъсири ҳар гуна фарҳангу мафкураи бегона ҳифз намоянд.

Дар вохӯрӣ масъалаҳои пешгирии омилҳои номатлуб  байни  наврасону ҷавонон,  пешгирии шомилшавӣ ҷавонон  ба гурӯҳҳои ифротгароӣ, пешгирӣ аз бемориҳои сироятӣ ва бурдани тарзи ҳаёти солим,  ба роҳ мондани корҳои тозагиву ободонӣ ва истифодаи самараноки заминҳои наздиҳавлигию ёрирасон низ баррасӣ шуданд.

АКС: Мақомоти иҷроияи ҳокимияти давлатии ноҳияи Лахш