Дар шаҳри Гулистон масъалаи бехатарии радиатсионӣ ва идоракунии партовҳои радиоактивӣ баррасӣ гардид

ДУШАНБЕ, 04.11.2025 /АМИТ «Ховар»/. Дар  шаҳри Гулистони вилояти Суғд ҷаласаи ҳамоҳангсозӣ баргузор  шуд, ки дар он дурнамои лоиҳаи «Ҷалби ҷонибҳои манфиатдор дар ҳалли масъалаҳои мероси уран дар Осиёи Марказӣ»  (марҳилаи III),  муҳокима гардид. Дар ин хусус ба АМИТ «Ховар»  аз Агентии амнияти химиявӣ, биологӣ, радиатсионӣ ва ядроии Академияи миллии илмҳои Тоҷикистон  хабар доданд.

Дар рафти ҷаласа намояндагони мақомоти маҳаллӣ, коршиносон ва мутахассисони Агентӣ вобаста ба татбиқи лоиҳа, дастовардҳо ва самтҳои афзалиятноки фаъолияти ояндаи онро муҳокима намуданд.

Марҳилаи сеюми лоиҳа бо мақсади густариши ҳамкорӣ, мубодилаи таҷриба ва ташаббуси озмоишӣ барои мусоидат ба барқарорсозии минтақаҳои урандор равона шудааст. Лоиҳа ба кам кардани хатарҳои экологӣ ва иҷтимоии марбут ба партовҳои ҷамъшудаи уран, ки аз фаъолиятҳои истихроҷи маъдан дар даврони пеш аз соҳибистиқлолӣ ба вуҷуд омадаанд, нигаронида шудааст.

Дар ҷаласа масъалаҳои марбут ба пешрафти лоиҳа, мушкилот ва дурнамои барқарорсозии мавзеъҳои мероси уран, бехатарии радиатсионӣ ва идоракунии партовҳои радиоактивӣ баррасӣ шуд.

Инчунин дар рафти ҷаласа ба иштирокчиён дарсҳои амалӣ оид ба истифодаи дозиметрҳо ва   нақшаҳои амалие, ки барои беҳтар намудани вазъи иҷтимоӣ-иқтисодӣ дар минтақаҳои мақсаднок равона шудаанд, пешниҳод гардид.

Дар хотимаи чорабинӣ масъалаи тақвияти  ҳамкорӣ байни  ҷонибҳои манфиатдор барои таъмини бехатарии радиатсионӣ ва ҳифзи саломатии сокиноне, ки дар наздикии мавзеъҳои мероси уран зиндагӣ мекунанд, таъкид карда шуд.

 АКС: Агентии амнияти химиявӣ, биологӣ, радиатсионӣ ва ядроии АМИТ