Донишҷӯи тоҷик дар мусобиқаи варзишӣ дар Донишгоҳи Кувайт сазовори ҷойи якум гардид

ДУШАНБЕ, 17.11.2025 /АМИТ «Ховар»/. 15 ноябр дар Донишгоҳи Кувайт мусобиқаҳои варзишии мухталиф баргузор гардиданд, ки дар он шаҳрванди Ҷумҳурии Тоҷикистон- донишҷӯйи курси 3-и ин донишгоҳ Бузургмеҳр Каримов дар мусобиқаи варзишии тирандозӣ сазовори ҷойи якум гардид.

Тавре ба АМИТ «Ховар» аз Сафорати Ҷумҳурии Тоҷикистон дар Давлати Кувайт хабар доданд, дар мусобиқаҳои варзишӣ беш аз  3000 донишҷӯёни ин муассиса, ки шаҳрвандони кишварҳои гуногуни ҷаҳон мебошанд, иштирок намуданд.

Иштироки донишҷӯёни тоҷик дар ин мусобиқаҳо на танҳо дастоварди шахсии онҳо, балки намунаи рушди ҳамкории илмӣ ва фарҳангӣ байни Тоҷикистону Кувайт мебошад.

Ёдовар мешавем, ки дар Донишгоҳи Кувайт зиёда аз 43 ҳазор донишҷӯ дар 15 факултаи мухталиф таҳсил доранд.

АКС: Сафорати Ҷумҳурии Тоҷикистон дар Давлати Кувайт