Федератсияи футболи Тоҷикистон барои дарёфти дараҷаи тиллоии оинномаи футболи оммавии КФО дархост ирсол кард

ДУШАНБЕ, 01.11.2025 /АМИТ «Ховар»/. Федератсияи футболи Тоҷикистон мувофиқи барномаи Оинномаи футболи оммавӣ (AFC Grassroots Charter Gold), ба Конфедератсияи футболи Осиё барои аъзогӣ дар сатҳи тиллоӣ дархост пешниҳод кардааст. Дар ин хусус ба АМИТ «Ховар» аз Федератсияи футболи Тоҷикистон хабар доданд.

Дар доираи раванди баҳогузорӣ аъзои футболи оммавии КФО Чокей Нима (Бутан) ва Раҳаф Крум (Сурия) бо сафари корӣ дар шаҳри Душанбе қарор доранд. Ҳадафи ин сафар санҷиши ҳамаҷониба ва тасдиқи мутобиқати барномаҳо, сохтор ва фаъолиятҳои Федератсияи футболи Тоҷикистон бо талаботи узвияти сатҳи тиллоӣ дар Оинномаи футболи оммавӣ мебошад.

31 октябр аъзои ҳайати  Конфедератсияи футболи Осиё бо ноибони президенти Федератсияи футболи Тоҷикистон Алишер Урунов ва Сайвалӣ Дониёрзода, инчунин директори Лигаи футболи кӯдакон ва наврасони Тоҷикистон Абдулло Соқиев мулоқот намуданд.

Дар рафти муҳокима ҷонибҳо самтҳои асосии рушди футболи оммавӣ дар Тоҷикистон, аз ҷумла барномаҳо барои кӯдакон ва ҷавонон,  мусобиқаҳои мактабӣ ва минтақавӣ, футболи занона ва дигар ташаббусҳоро дар самти футболи оммавӣ дар мамлакат баррасӣ карданд.

АКС: Федератсияи футболи Тоҷикистон