Тоҷикистон ва Ҷопон дар соҳаи мониторинги пиряхҳо, газҳои гулхонаӣ ва сифати ҳаво Ёддошти тафоҳум ба имзо расониданд

ДУШАНБЕ, 17.11.2025 /АМИТ «Ховар»/. 15 ноябр дар ҳошияи Конфронси 30-юми ҷонибҳои Конвенсияи қолабии Созмони Милали Муттаҳид оид ба тағйирёбии иқлим (СОР-30) дар шаҳри Белени Бразилия маросими имзои Ёддошти тафоҳум байни Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон ва Ширкати ҷопонии «ArkEdge Space Inc» баргузор гардид. Дар ин хусус АМИТ «Ховар» бо истинод ба Агентии обуҳавошиносии Кумитаи ҳифзи муҳити зист хабар медиҳад.

Чорабинӣ қадами муҳим дар густариши ҳамкорӣ дар самти таҳкими иқтидор, санҷиши фосилавии пиряхҳо (дистансионӣ), мониторинги тағйирёбии иқлим, газҳои гулхонаӣ ва сифати ҳавои атмосферӣ ба ҳисоб меравад. Он барои баланд бардоштани устувории иқлимӣ ва иқтидори илмӣ аҳамияти калон дорад.

Дар доираи баргузории чорабинӣ вохӯрии директори Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон Абдулло Қурбонзода бо муовини вазири масъалаҳои глобалии муҳити зисти Ҷумҳурии Ҷопон Кентаро Дои баргузор гардид. Дар мулоқот тарафҳо барои пешбурди корҳои муштараки илмӣ, иштирок дар конфронсҳои байналмилалӣ ва баррасии имконияти ҷалби маблағгузории шарикони байналмилалӣ изҳори  омодагӣ намуданд.

Имзои Ёддошти тафоҳум нишон медиҳад, ки Ҷумҳурии Тоҷикистон ба пешрафти илми иқлимшиносӣ, густариши ҳамкорӣ бо кишварҳои дигар ва истифодаи роҳҳои наву замонавӣ барои назорат ва омӯзиши тағйирёбии иқлим аҳамияти калон медиҳад. Масъалаи мазкур барои Ҷумҳурии Тоҷикистон, ки дар Осиёи Марказӣ дорои захираҳои калони пиряхҳо мебошад, бисёр муҳим мебошад.

АКС: Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон