Дар Ҳамбург дурнамои густариши ҳамкории иқтисодию тиҷоратии музофот бо Тоҷикистон баррасӣ гардид

ДУШАНБЕ, 20.12.2025 /АМИТ «Ховар»/. Дар шаҳри бандарии Ҳамбург вохӯрии Сафири Фавқулода ва Мухтори Ҷумҳурии Тоҷикистон дар Олмон Имомудин Сатторов бо намояндаи Палатаи савдо ва саноати Ҳамбург дар самти лоиҳаҳои байналмилалии иқтисодӣ ва долонҳои нақлиётӣ Мирко Новак баргузор гардид.

Тавре ба АМИТ «Ховар» аз Сафорати Тоҷикистон дар Олмон хабар доданд, зимни мулоқот масъалаҳои марбут ба вазъи кунунӣ ва дурнамои густариши ҳамкории иқтисодию тиҷоратии музофоти федеролии Ҳамбург бо Ҷумҳурии Тоҷикистон, инчунин имконияти танзими чорабиниҳои муштарак бо ҷалби доираҳои соҳибкорӣ мавриди баррасӣ қарор гирифт.

Дар ҳамин рӯз ҳамчунин дар қароргоҳи Консулгарии фахрӣ вохӯрии Сафир бо роҳбарони диаспораҳои шаҳри Ҳамбург бо иштироки Консули фахрии Ҷумҳурии Тоҷикистон дар музофотҳои федеролии Ҳамбург ва Шлезвиг-Ҳолштайн Куруш Пуркиён баргузор гардид. Дар ҷараёни он масъалаҳои таҳкими ҳамкории Сафорат бо диаспораҳои шаҳри Ҳамбург, инчунин ташкили чорабиниҳои фарҳангӣ, аз ҷумла таҷлили ҷашни Наврӯз дар соли 2026 баррасӣ карда шуданд.

АКС: Сафорати Тоҷикистон дар Олмон