Дар Душанбе оид ба ҳуқуқи инсон ва механизмҳои амалишавии он ҷаласа доир гардид

ДУШАНБЕ, 11.12.2025 /АМИТ «Ховар»/. Ҳимояи ҳуқуқҳои инсон дар ҷомеаи муосир яке аз омилҳои асосии таҳкими давлатдории миллӣ, суботи сиёсӣ ва рушди устувор ба ҳисоб меравад. Тоҷикистон ҳамчун аъзои созмонҳои бонуфузи байналмилалӣ, аз ҷумла Созмони Милали Муттаҳид ва Созмони амният ва ҳамкорӣ дар Аврупо ба иҷрои уҳдадориҳои байналмилалии худ дар самти ҳифзи ҳуқуқу озодиҳои инсон содиқ мемонад.Ин матлаб 10 декабр зимни  ҷаласа бахшида ба Рӯзи ҳуқуқи инсон дар мавзуи «Ҳуқуқи инсон ва механизмҳои амалишавии он» дар Хадамоти гумруки назди Ҳукумати Ҷумҳурии Тоҷикистон баён карда шуд.

Тавре ба АМИТ «Ховар» аз Хадамоти гумруки назди Ҳукумати Ҷумҳурии Тоҷикистон иттилоъ доданд, дар ҷаласа иштирокчиён доир ба аҳамияти Рӯзи ҳуқуқи инсон, дастовардҳои мамлкат дар соҳаи ҳуқуқу озодиҳои инсон ва таҳкими заминаҳои ҳуқуқии ҷомеаи шаҳрвандӣ сухан гуфтанд. Гуфта шуд, ки мардуми Тоҷикистон аз рӯзҳои аввалини соҳибистиқлолӣ озодии инсон ва ҳифзи ҳуқуқу озодиҳои ӯро муқаддас шуморидаанд.

Дар ҷаласа иброз гардид, ки Тоҷикистон аз замони ба даст овардани истиқлолияти давлатӣ тадбирҳои муҳими илмӣ, амалӣ ва қонунгузориро ба роҳ монд, ки натиҷаи онҳо аз ҷониби мутахассисони дохилию хориҷӣ баҳои баланд гирифтанд.

Сардори Раёсати ташкилию бозрасии Хадамоти гумрук Абдумумин Муродиён гуфт, ки «ҳифзи ҳуқуқу озодиҳои инсон дар ҳама давраҳо арзиши асосии ҷомеаи башарӣ ба ҳисоб меравад. Идеяи озодӣ ва ҳимояи ҳуқуқи инсон решаҳои амиқи таърихӣ дорад ва дар тамаддуни башарӣ шахсиятҳое буданд, ки ба ин арзишҳо такя мекарданд».

Ҳамчунин иброз гардид, ки арзишҳо — озодӣ, адолат, баробарӣ ва эҳтироми ҳуқуқи инсон то имрӯз аҳамияти ҷаҳонӣ дошта, илҳомбахши рушди ҷомеаҳои муосир мебошанд. Ҷумҳурии Тоҷикистон низ ба ин меъёрҳои умумибашарӣ содиқ буда, дар давраи соҳибистиқлолӣ барои таҳкими ҳуқуқу озодиҳои инсон ва баланд бардоштани манзалати инсон дар ҷомеа тадбирҳои муҳим меандешад.

АКС: Хадамоти гумруки назди Ҳукумати Ҷумҳурии Тоҷикистон