Хазинаи байналмилалии асъор шарҳи сеюм ва ниҳоии барномаи PCI-ро дар Тоҷикистон муваффақона анҷом дод

ДУШАНБЕ, 26.12.2025 /АМИТ «Ховар»/. Хазинаи байналмилалии асъор   баррасии сеюм ва ниҳоии татбиқи Барномаи Ҷумҳурии Тоҷикистон дар доираи «Фишанги ҳамоҳангсозии сиёсат»-ро  (PCI) ба анҷом расонид, иттилоъ медиҳад АМИТ «Ховар» бо истинод ба Бонки миллии Тоҷикистон.

Иҷрои муваффақонаи барнома ба таъмини суботи макроиқтисодӣ, афзоиши устувории иқтисод ва татбиқи ислоҳоти сохторӣ мусоидат менамояд. Дар доираи ин барнома мақомоти Тоҷикистон тадбирҳои мувофиқашударо дар самтҳои сиёсати фискалӣ, пулию қарзӣ ва молиявӣ пайгирона татбиқ намуданд. Дар ин маврид ба пешгирии болоравии сатҳи таваррум, таҳкими интизоми буҷетӣ, баланд бардоштани сатҳи шаффофияти молияи давлатӣ ва коҳиш додани осебпазирии бахши молиявӣ таваҷҷуҳи хос зоҳир карда шуд.

Хазинаи байналмилалии асъор   нишондиҳандаҳои устувори макроиқтисодӣ, аз ҷумла рушди иқтисодӣ, беҳтар гардидани мавқеи берунӣ, нигоҳдории суботи нархҳо, инчунин пешрафт дар татбиқи ислоҳоти сохториро мусбат арзёбӣ намуд. Сиёсати татбиқшуда ба таҳкими эътимод ба иқтисоди миллӣ ва афзоиши устувории он дар баробари таконҳои берунӣ мусоидат намуд.

Муваффақона анҷом ёфтани Барномаи PCI ва натиҷаҳои бадастомада барои густариши ҳамкории минбаъдаи Тоҷикистон бо Хазинаи байналмилалии асъор   заминаи устувор фароҳам меоранд.

Татбиқи муваффақонаи Барномаи ҳамоҳангсозии сиёсат чун ишораи мусбат барои сармоягузорони байналмилалӣ, шарикони рушд ва агентиҳои рейтингӣ хизмат намуд.

АКС: Бонки миллии Тоҷикистон