Дар даври ноҳиявии озмуни «Хушдомани беҳтарин» Давлатбӣ Каримова сазовори ҷойи аввал гардид

РӮДАКӢ, 06.01.2026 /АМИТ «Ховар»/. Шуъбаи кор бо занон ва оилаи Мақомоти иҷроияи ҳокимияти давлатии ноҳияи Рӯдакӣ бо мақсади татбиқи «Барномаи давлатии рушди оила дар Ҷумҳурии Тоҷикистон барои солҳои 2024-2028» дар байни занону модарони рӯзгордидаи ҷамоатҳои шаҳраку деҳот даври ноҳиявии озмуни «Хушдомани беҳтарин»-ро баргузор намуд. Дар ин хусус ба хабарнигори минтақавии АМИТ «Ховар» Субҳониддини Маҳмуд  аз Мақомоти иҷроияи ҳокимияти давлатии  ноҳияи Рӯдакӣ иттилоъ доданд.

Озмуни мазкур бо мақсади тақвият бахшидани мақом ва нақши оила дар ҷомеа, баланд бардоштани масъулияти оила дар таҳкими фарҳанги оиладорӣ ҳамчун арзиши муҳими иҷтимоию фарҳангӣ, нигоҳдорандаи анъанаҳои миллӣ, маънавӣ ва ахлоқӣ дар муносибатҳои оилавӣ, тақвияти мақом ва нақши хушдоман дар оила ва ҷомеа, боло бурдани маърифати ҳуқуқии шаҳрвандон ва рӯзгордории оилаҳо, нақши хушдоман дар тарбия ва ташаккули шахсияти фарзанд, солим, устувор ва пойдор нигоҳ доштани оилаҳо, нақши хушдоман дар пешгирии таъсиррасонии омилҳои доғи рӯз ба муносибатҳои оиладорӣ ва омода намудани ҷавонон ба ҳаёти мустақилона гузаронида мешавад.

Ба ҳунари ғолибони озмун аз рӯйи талаботи  касбу ҳунаромӯзӣ чун омили таҳкиму пойдории оила, саҳми хушдоман дар сарфаю сариштакорӣ ва рӯзгордорӣ, солимии оила дар муносибатҳои оилавӣ ва тарбияи дурусти фарзандон, саҳми оила дар ободонии хона, кӯча, шаҳрак ва маҳалла, нақши оила дар ҳифзи арзишҳои фарҳанги миллӣ ва  ҷалби фарзандон ба хизмати Модар-Ватан, инчунин иштироки онҳо дар корҳои ҷамъиятӣ ва фардӣ баҳо гузошта шуд.

Дар озмун Давлатбӣ Каримова  аз Ҷамоати деҳоти Лоҳур хушдомани беҳтарин дониста шуда, сазовори ҷойи аввал гардид. Ғолиби озмун  бо Диплом ва туҳфаҳои хотиравии Кумитаи кор бо занон ва оилаи назди Ҳукумати Ҷумҳурии Тоҷикистон қадрдонӣ карда шуд.

АКС: Мақомоти иҷроияи ҳокимияти давлатии ноҳияи Рӯдакӣ