«МАҚОМИ ЗАН ДАР МЕҲВАРИ ПАЁМ». Дар ноҳияи Ёвон ҳамоиши занону духтарон баргузор гардид

ДУШАНБЕ, 07.01.2026 /АМИТ «Ховар»/. Дар ноҳияи Ёвон бо ибтикори Кумитаи кор бо занон ва оилаи назди Ҳукумати Ҷумҳурии Тоҷикистон дар ҳамкорӣ бо Мақомоти иҷроияи ҳокимияти давлатии ноҳияи Ёвон таҳти унвони «Мақоми зан дар меҳвари Паём: аз сухан то амал» ҳамоиши занону духтарон доир гардид.

Тавре ба АМИТ «Ховар» аз Кумитаи кор бо занон ва оилаи назди Ҳукумати Ҷумҳурии Тоҷикистон хабар доданд, ҳамоиш бо мақсади шарҳу тавзеҳи нуктаҳои муҳими Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ, таҳкими нақши занон дар ҷомеа, баланд бардоштани маърифати сиёсӣ, ҳуқуқӣ ва иҷтимоии занону духтарон, инчунин ҷалби онҳо ба созандагию бунёдкорӣ баргузор карда шуд.

Раиси Кумитаи кор бо занон ва оилаи назди Ҳукумати Ҷумҳурии Тоҷикистон Бунафша Файзиддинзода иброз намуд, ки Паёми Президенти Тоҷикистон ба Маҷлиси Олӣ ҳамчун санади муҳими роҳнамо самтҳои асосии рушди ҷомеаро муайян менамояд. Дар он ба масъалаи баланд бардоштани мақоми зан дар ҷомеа таваҷҷуҳи хосса зоҳир гардидааст.

Таъкид шуд, ки дар солҳои соҳибистиқлолӣ бо дастгирии Пешвои миллат муҳтарам Эмомалӣ Раҳмон бобати фароҳам овардани шароити мусоид барои фаъолият ва иштироки васеи занон дар ҳаёти сиёсӣ, иқтисодӣ, иҷтимоӣ ва фарҳангии мамлакат заминаи устувор гузошта шуд. Имрӯз занони тоҷик дар ҳама соҳаҳо, аз ҷумла идоракунии давлатӣ, маориф, тандурустӣ, соҳибкорӣ ва кишоварзӣ фаъолияти пурсамар доранд.

«Тарбияи дурусти духтарон, баланд бардоштани сатҳи маърифатнокии онҳо, пешгирии амалҳои номатлуб ва таҳкими оила аз вазифаҳои муҳимтарини ҷомеа ба ҳисоб рафта, Ҳукумати мамлакат дар ин самт пайваста тадбирҳои зарурӣ меандешад»,– баён гардид дар ҳамоиш.

Раиси ноҳияи Ёвон Икромиддин Вализода изҳор дошт, ки  тарбияи насли солим ва худогоҳ ба нақши модар вобаста буда, зан ҳамчун тарбиятгари асосии оила ва ҷомеа масъулияти бузург дорад. Дар ин замина ҷалби занону духтарон ба илмомӯзӣ, касбомӯзӣ ва пешгирии зуҳуроти номатлуб аз ҷумлаи вазифаҳои муҳими мақомоти маҳаллӣ мебошад.

«Мақомоти иҷроияи ҳокимияти давлатии ноҳияи Ёвон сиёсати иҷтимоии давлатро дар самти дастгирии занон ва таҳкими мақоми онҳо пайгирона татбиқ намуда, барои фароҳам овардани шароити мусоид барои иштироки фаъолонаи занону духтарон дар ҳаёти сиёсӣ, иқтисодӣ ва иҷтимоӣ тадбирҳои зарурӣ меандешад»,– иброз намуд раиси ноҳияи Ёвон.

Дар фарҷом таъкид шуд, ки чунин ҳамоишҳо ба боло бурдани ҳисси ватандӯстӣ, масъулиятшиносӣ ва фаъолгардонии занону духтарон дар ҳаёти ҷамъиятӣ мусоидат намуда, татбиқи амалии нуктаҳои Паёми Президенти Ҷумҳурии Тоҷикистон ба Маҷлиси Олиро таъмин менамоянд.

АКС: Кумитаи кор бо занон ва оилаи назди Ҳукумати Ҷумҳурии Тоҷикистон