Дар минтақаи Кӯлоб корҳои фаҳмондадиҳӣ оид ба истифодаи сарфакоронаи неруи барқ идома доранд

ДУШАНБЕ, 28.02.2026 /АМИТ «Ховар»/.  Дар минтақаи Кӯлоб аз ҷониби  намояндагони Раёсати Агентии назорати давлатии энергетикии назди Президенти Ҷумҳурии Тоҷикистон корҳои фаҳмондадиҳӣ  ва дигар чорабиниҳои мақсаднок дар байни аҳолӣ оид ба сарфакорона истифода бурдани неруи барқ идома доранд. Дар ин хусус ба АМИТ «Ховар» аз Мақомоти иҷроияи ҳокимияти давлатии шаҳри Кӯлоб иттилоъ доданд.

Андешидани тадбирҳои мақсаднок аз ҷониби масъулони соҳа ва дар ин замина амалисозии ҳадафҳои ҳукумати мамлакат расидан ба нишондодҳои назаррасро ба манфиати иқтисодии ҳар оила ва рушду тараққиёти мамлакат таъмин месозад.

Намояндагони Раёсати Агентии назорати давлатии энергетикии назди Президенти Ҷумҳурии Тоҷикистон дар минтақаи Кӯлоб дар доираи татбиқи ҳадафҳои ҳукумати мамлакат пайваста дар шабакаҳои барқӣ, байни ташкилоту муассисаҳо амалиёти назоратию муоинаи техникӣ ва бо сокинон вохӯрию суҳбатҳо ва чорабиниҳои фаҳмондадиҳӣ мегузаронанд.

Ҳадафи гузаронидани чунин чорабиниҳо баланд бардоштани сатҳи маърифатнокии шаҳрвандон доир ба истифодаи самараноку оқилонаи неруи барқ ва таъмини пешрафту зиндагии осоиштаи мардум мебошад.

Таҳлилҳои гузаронида ва натиҷаи фаъолияти пурсамар давоми соли 2025 бозгӯйи онанд, ки раванди чунин чорабиниҳои ҳадафнок барои пешбурди фаъолияти кормандони шабакаҳои барқи шаҳру ноҳияҳо, пардохти саривақтии маблағи барқи истифодашуда аз ҷониби муштариён ва коҳиш ёфтани сатҳи талафоти неруи барқ заминаи воқеӣ фароҳам меорад.

АКС: АМИТ «Ховар»