Дар заминҳои бекорхобидаи теппаҳои деҳаи Шодоби ноҳияи Варзоб боғи намунавӣ бунёд карда шуд

ВАРЗОБ, 23.02.2026 /АМИТ «Ховар»/. 21 феврал бо иштироки муовини Сарвазири Ҷумҳурии Тоҷикистон Сулаймон Зиёзода ва  роҳбарияту ҳайати шахсии Вазорати корҳои дохилии Ҷумҳурии Тоҷикистон дар заминҳои бекорхобидаи теппаҳои ҳудуди деҳаи Шодоби Ҷамоати деҳоти Чорбоғи ноҳияи Варзоб навъҳои гуногуни дарахтони ҳамешасабзу ороишии арча ва ниҳолҳои мевадиҳанда шинонида шуданд. Дар ин хусус мухбири минтақавии АМИТ «Ховар» Субҳониддини Маҳмуд  бо истинод ба Мақомоти иҷроияи ҳокимияти давлатии ноҳияи Варзоб  хабар медиҳад.

Бо ташаббуси роҳбарияти Вазорати корҳои дохилӣ барои дар амал татбиқ намудани «Барномаи давлатии кабудизоркунии Ҷумҳурии Тоҷикистон барои давраи то соли 2040» дар заминҳои бекорхобидаи теппаҳои ҳудуди деҳоти Шодоби Ҷамоати деҳоти Чорбоғи ноҳияи Варзоб дар масоҳати зиёда аз 15,5 гектар навъҳои гуногуни дарахтони ҳамешасабзу ороишии арча ва ниҳолҳои мевадиҳанда, аз қабили олу, олуча, гелос, ки шумораашон беш аз 15 ҳазор бехро ташкил медиҳад, бо риояи талаботи агрономӣ шинонида шуд. Ин мавзеъ дар оянда ҳамчун боғи намунавӣ муаррифӣ мегардад.

Ба хотири сабзиши ниҳолҳои шинонида  бо ибтикори роҳбарияти Вазорати корҳои дохилӣ  дар ин мавзеъ 3 зарфи 25-тоннагӣ ва 1 зарфи 5-тоннагии захиракунандаи об гузошта шуда, инчунин барои таъмин намудани ниҳолҳо бо оби полезӣ 40 ҳазор метр қубурҳои қутрашон гуногун  насб гардиданд. Нигоҳубинкунандагони ин боғ метавонанд дар ҳама ҳолат барои сабзиши дарахтон  аз ин об самаранок истифода намоянд.

АКС: Мақомоти иҷроияи ҳокимияти давлатии ноҳияи Варзоб