Дастаи «Ҳулбук»-и Восеъ ғолиби Ҷоми Федератсияи футболи Тоҷикистон-2026 шуд

ДУШАНБЕ, 21.02.2026 /АМИТ «Ховар»/. Дастаи «Ҳулбук»-и Восеъ барандаи Ҷоми Федератсияи футболи Тоҷикистон-2026 оид ба футбол гардид, хабар медиҳад АМИТ «Ховар» бо истинод ба Федератсияи футболи Тоҷикистон.

Дар бозии ниҳоӣ дастаҳои «Барқчӣ»-и Ҳисор ва «Ҳулбук»-и Восеъ рақобат карданд. Тими «Барқчӣ» дар аввали вохӯрӣ бо ҳисоби 2:0 пешсаф буд, аммо бартариро натавонист то охир нигоҳ дорад. «Ҳулбук» фишорро ба дарвозаи рақибон афзоиш дода, тавонист натиҷаро мусовӣ кунад.

Пас аз анҷоми вақти асосӣ силсилаи пеналти таъйин шуд, ки дар он «Ҳулбук» бо ҳисоби 4:2 ғолиб гардид. Ҳамин тариқ, даста бори аввал дар таърихи худ ҷоизаи Ҷоми ФФТ-ро ба даст овард.

Дарвозабони «Ҳулбук» Иброҳим Исмоилов, ки яке аз зарбаҳои пеналтиро баргардонд, беҳтарин бозигари дидори ниҳоӣ номида шуд.

Дастаи «Ҳосилот»-и Фархор дар Ҷоми Федератсияи футболи Тоҷикистон-2026 дар бозӣ барои ҷойи сеюм дастаи «Панҷшер»-ро бо ҳисоби 3:0 шикаст дод.

АКС: Федератсияи футболи Тоҷикистон