Хизмат дар сафи артиш нишонаи садоқат ба Ватан ва эҳсоси баланди ватандӯстӣ мебошад

ДУШАНБЕ, 23.02.2026 /АМИТ «Ховар»/. Бахшида ба 33-солагии Қувваҳои Мусаллаҳи Ҷумҳурии Тоҷикистон дар Донишгоҳи давлатии молия ва иқтисоди Тоҷикистон таҳти унвони «Артиши миллӣ — сипари боэътимоди давлат ва кафили сулҳу суботи мамлакат» ҳамоиши ҳарбӣ-ватандӯстӣ баргузор шуд. Дар ин хусус АМИТ «Ховар» бо истинод ба ин донишгоҳ хабар медиҳад.

Дар ҷамъомад аз нақши таърихию мондагори Президенти ҷумҳурӣ муҳтарам Эмомалӣ Раҳмон дар таъсис ва ташаккули Қувваҳои Мусаллаҳи Тоҷикистон ёдоварӣ гардид. Изҳор шуд, ки маҳз сиёсати хирадмандона, иродаи устувор ва талошҳои пайвастаи роҳбарияти давлат имкон дод, ки Артиши миллӣ аз марҳилаи ташаккули душвор гузашта, имрӯз ба неруи боэътимоди ҳифзи истиқлолият ва амнияти ҷумҳурӣ табдил ёбад.

Сарбозону афсарони тоҷик бо ҳисси баланди масъулият ва садоқат ба Савганди ҳарбӣ рисолати муқаддаси худ — ҳифзи истиқлолият, тамомияти арзӣ ва амнияти давлату ҷомеаро бо сарбаландӣ иҷро менамоянд.

Гуфта шуд, ки Рӯзи Қувваҳои Мусаллаҳ на танҳо иди касбии хизматчиёни ҳарбӣ, балки ҷашни тамоми мардуми ҷумҳурӣ мебошад. Хизмат дар сафи артиш нишонаи ҷасорат, матонат, садоқат ба Ватан ва эҳсоси баланди ватандӯстӣ аст.

Барномаи фарҳангии фараҳбахшу дилнишини шуъбаи фарҳанги донишгоҳ пешкаши иштирокдорон гардид.

АКС: Донишгоҳи давлатии молия ва иқтисоди Тоҷикистон