НИШАСТИ МАТБУОТӢ. Соли 2025 хароҷоти суғуртаи иҷтимоӣ ва нафақа беш аз 5 миллиард сомониро ташкил дод

ДУШАНБЕ, 13.02.2026 /АМИТ «Ховар»/. Соли 2025 хароҷоти суғуртаи иҷтимоӣ ва нафақа 5 миллиарду 682,0 миллион сомониро ташкил дод, ки нисбат ба ҳамин давраи соли 2024   1 миллиарду 4,9 миллион сомонӣ афзоиш ёфтааст. Дар ин хусус директори Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон Абдураҳмон Ҳалимзод имрӯз зимни нишасти матбуотӣ иттилоъ дод.

Абдураҳмон Ҳалимзод иброз дошт, ки дар давраи ҳисоботӣ маблағгузории пардохти нафақа ба андозаи 5 миллиарду 162,2 миллион сомонӣ таъмин гардид, ки нисбат ба соли 2024    869 миллион сомонӣ афзоиш ёфтааст. Дар айни замон дар ҷумҳурӣ қарздорӣ аз пардохти нафақа вуҷуд надорад.

Дар ҷараёни нишасти матбуотӣ иттилоъ дода шуд, ки ба ҳолати 1 январи соли 2026 шумораи умумии нафақагирон 877 ҳазору 206 нафарро ташкил дод.  Шумораи умумии нафақагирони маъюб 172 ҳазору 538 ҳазор нафар мебошад. Аз ҷумла,

— гурӯҳи якум – 18 ҳазору 422 нафар;

— гурӯҳи дуюм – 85 ҳазору 221 нафар;

— гурӯҳи сеюм – 33 ҳазору 514 нафар;

— маъюбони аз синни кӯдакӣ то 18-солагӣ- 25 ҳазору 381;

— шумораи кӯдакони ятими кулл – 1082 нафар;

— шумораи кӯдакони нимятим – 72 ҳазору 205 нафар;

— шумораи маъюбон ва иштирокчиёни Ҷанги дуюми ҷаҳон  – 13 нафар;

— шумораи иштирокчиёни Ҷанги дуюми ҷаҳон дар ақибгоҳ – 79 нафар.

Ёдовар мешавем, ки дар Тоҷикистон ҳуқуқи аҳолии калонсол тибқи моддаи 39-и Конститутсияи Ҷумҳурии Тоҷикистон ҳимоя карда мешавад. Дар ин модда омадааст, ки ҳар шахс дар пиронсолӣ, ҳангоми беморӣ, маъюбӣ, гум кардани қобилияти кор, маҳрум шудан аз сарпараст ва мавридҳои дигаре, ки қонун муайян кардааст, кафолати таъмини иҷтимоӣ дорад.

Фирӯзаи ДАВЛАТ,
АМИТ «Ховар»

АКС: АМИТ «Ховар»