Дар Кумитаи рушди маҳал бахшида ба ҷашни Наврӯз ҳамоиши фарҳангӣ доир гардид

ДУШАНБЕ, 31.03.2026. /АМИТ «Ховар»/. Дар Кумитаи рушди маҳали назди Президенти Ҷумҳурии Тоҷикистон бахшида ба Ҷашни байналмилалии Наврӯз ҳамоиши фарҳангӣ доир гардид. Дар ин хусус ба  АМИТ «Ховар» аз Кумитаи рушди маҳали назди Президенти Ҷумҳурии Тоҷикистон иттилоъ доданд.

Дар ҳамоиш иброз гардид, ки мардуми тоҷик дар замони соҳибистиқлолӣ тавассути сиёсати оқилона ва созандаи Президенти Ҷумҳурии Тоҷикистон муҳтарам Эмомалӣ Раҳмон фарҳангу анъана ва арзишҳои волою муқаддаси худро эҳё намуданд.

Наврӯз аз маҳбубтарин ҷашнҳои миллии мо буда, аз рӯзгори қадим ибтидо мегирад ва то ба имрӯз идея ва анъанаҳои олии миллӣ ва умумибашарияшро бо беҳтарин ваҷҳ идома мебахшад.

Изҳор гардид, ки Наврӯз, қабл аз ҳама, ҷашни кишоварзон аст, зеро он айёми эҳёи табиат, фарорасии кишту кори деҳқон ва  робитаи инсон бо табиат мебошад. Халқ ин ҷашни миллиро давоми қарнҳои тӯлонӣ аз насл ба насл ба мерос гузошта, ойини ибратомӯзи онро сарчашмаи бузурги ахлоқиву тарбиявӣ ва бунёдкориву созандагӣ донистааст. Он на танҳо рамзи эҳёи табиат ва оғози фасли баҳор аст, балки таҷассумгари ормонҳои неки инсонӣ — сулҳу субот, ҳамдигарфаҳмӣ, дӯстӣ ва ҳамбастагӣ маҳсуб мешавад. Ин ҷашни бостонӣ мардумро ба созандагиву бунёдкорӣ, эҳтироми анъанаҳои миллӣ ва пос доштани арзишҳои фарҳангӣ ҳидоят менамояд.

АКС: Кумитаи рушди маҳали назди Президенти Ҷумҳурии Тоҷикистон