Хабарнигорони Қирғизистон аз табиати дилфиреби ноҳияи Варзоб ва бозори «Меҳргон» боздид намуданд
ДУШАНБЕ, 26.03.2026 /АМИТ «Ховар»/. Имрӯз гурӯҳи хабарнигорони Қирғизистон дар ноҳияи Варзоб бо табиати зебо ва фаъолияти Осоишгоҳи «Сароб» шинос шуданд.
Тавре хабарнигори АМИТ «Ховар» иттилоъ медиҳад, ҳайати меҳмононро дар даромадгоҳи ноҳияи Варзоб бо риояи расму ойинҳои миллӣ ва анъанаҳои неки меҳмоннавозии тоҷикона самимона истиқбол гирифтанд.
Меҳмонон дар ин минтақаи Тоҷикистон бо табиати дилфиреб, куҳҳои сарбафалаккашида, манзараҳои нотакрор ва имкониятҳои сайёҳии ноҳия шинос гардиданд.
Ҳамзамон барои меҳмонон намоиши ҳунарҳои мардумӣ ташкил карда шуд. Онҳо бо намунаҳои гуногуни ҳунарҳои анъанавии халқи тоҷик шинос шуда, ба таомҳои миллии омодакардашуда баҳои баланд доданд.
Зимни шиносоӣ бо фаъолияти Осоишгоҳи «Сароб» ба меҳмонон иттилоъ дода шуд, ки ин муассисаи табобатию истироҳатӣ дар баландии тақрибан 2000 метр аз сатҳи баҳр ҷойгир буда, соли 2004 ба фаъолият оғоз намудааст. Осоишгоҳ бо шароити мусоиди истироҳат, табобати муосир ва муҳити солими табиӣ барои ҷалби сайёҳони дохиливу хориҷӣ аҳамияти калон дорад.
Инчунин дар ин рӯз хабарнигорони васоити ахбори оммаи Қирғизистон дар шаҳри Душанбе аз бозори «Меҳргон» боздид намуданд. Меҳмонон дар ин макон бо маҳсулоти кишоварзии ватанӣ шинос шуда, меваю сабзавот, зироати маҳаллӣ ва маҳсулоти коркарди деҳқонро аз наздик диданд.
Ёдовар мешавем, ки сафари хабарнигорони Қирғизистон дар Тоҷикистон то 27 март идома меёбад.
Ҳадафи асосии ин сафар таҳкими ҳамкории иттилоотӣ, тавсеаи робитаҳои касбӣ байни воситаҳои ахбори омма ва густариши муносибатҳои дӯстона байни Ҷумҳурии Тоҷикистон ва Қирғизистон мебошад.
Бояд гуфт, ки боздиди хабарнигорони Қирғизистон аз Тоҷикистон сафари ҷавобӣ маҳсуб меёбад. Зеро қаблан гурӯҳи хабарнигорони Тоҷикистон моҳи июли соли 2025 ба Ҷумҳурии Қирғизистон бо ҳамин мақсад сафар анҷом дода буданд.
АКС: АМИТ «Ховар»
Ҷаласаи Комиссияи Озмуни ҷумҳуриявии «Донандаи беҳтарини асарҳои Пешвои миллат» доир гардид
«РАҚС МОРО МУТТАҲИД МЕНАМОЯД». Таҳти чунин унвон дар Тоҷикистон фестивали байналмилалӣ доир мегардад
Дар ноҳияи Айнӣ бахшида ба зодрӯзи Қаҳрамони Тоҷикистон Садриддин Айнӣ ҳамоиши илмӣ-адабӣ баргузор гардид
ИМРӮЗ — ЗОДРӮЗИ САДРИДДИН АЙНӢ. Осори Устод Айнӣ ҳамчун сарчашмаи муҳими илмӣ ва фарҳангӣ истифода мешавад
АЙНИШИНОСЕ ПУРТАЛОШ АЗ КИШВАРИ ҲАМЗАБОН. Эҳдо ба зодрӯзи сардафтари адабиёти муосири тоҷик Садриддин Айнӣ
ИҚТИСОДИ РАҚАМӢ ВА ИННОВАТСИЯ. Дар самти рақамикунонии ёдгориҳои таърихию фарҳангӣ ҳамоиш доир шуд
«ДИДОР». Бахшида ба 35-солагии Истиқлоли давлатӣ намоиши мусаввараҳои нодир ифтитоҳ ёфт
Рӯзҳои фарҳанги Тоҷикистон дар Беларус доир мегарданд
СИМПОЗИУМИ БАЙНАЛМИЛАЛИИ ХУТАЛИ ҚАДИМ. Он таърих ва фарҳанги бостонии халқи тоҷикро ба ҷаҳониён муаррифӣ менамояд
Дабири кулли СААД дар Осорхонаи миллӣ бо таъриху тамаддуни тоҷикон шинос шуд
Дар шаҳри Бӯстон даври шаҳрии Фестивал-озмуни ҷумҳуриявии «Як матову сад ранг» баргузор гардид
Дар шаҳри Душанбе бо мақсади муаррифии дастовардҳои Тоҷикистон дар самти эҳёи ёдгориҳои таърихӣ ҳамоиш доир шуд
