«КИШВАРИ САБЗ». Дар шафати роҳи мошингарди Конибодом –Хуҷанд 2700 бех ниҳол шинонида мешавад

ДУШАНБЕ, 05.03.2026 /АМИТ «Ховар»/. Дар доираи  тадбирҳои амалии ободонию сабзазоркунӣ дар шафати роҳи мошингарди  Конибодом–Хуҷанд, ки аҳамияти байналмилалӣ дорад,  200 бех ниҳоли дарахти ҳамешасабзи санавбар шинонида шуд, иттилоъ медиҳад АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон.

Дар маҷмуъ дар ин қитъаи роҳ шинонидани 2700 бех ниҳоли дарахтони ҳамешасабзу ороишӣ ва сояафкан пешбинӣ гардидааст, ки ба беҳдошти манзараи роҳ, коҳиши таъсири омилҳои манфии муҳити зист ва ташаккули фазои сабзи муосир мусоидат мекунанд.

Ҳамзамон дар доираи татбиқи сиёсати давлатии экологӣ ва рушди низоми сабзазоркунӣ дар сатҳи ҷумҳурӣ роҳбарияти Кумитаи ҳифзи муҳити зисти назди Ҳукумати Ҷумҳурии Тоҷикистон  ва шаҳри Конибодом аз ниҳолхонаи бахши ҳифзи муҳити зисти шаҳр боздид намуданд.

Ниҳолхона дар 2,5 гектар доман паҳн карда, яке аз пойгоҳҳои муҳими таъминоти ниҳолҳои ҳамешасабзу ороишӣ дар минтақа мебошад. Дар он парвариши ниҳоли дарахтони санавбар, сарв, арча, булут, ақоқиё ва сафедор ба роҳ монда шудааст. Ҳоло дар ниҳолхона зиёда аз 51 ҳазор бех ниҳолҳои гуногуни ороишӣ ва ҳамешасабз парвариш меёбанд, ки барои таъмини маъракаи ниҳолшинонӣ ба шаҳру ноҳияҳо равона карда мешаванд.

Зимни шиносоӣ бо раванди истеҳсол ва нигоҳубини ниҳолҳо иброз гардид, ки рушди чунин хоҷагиҳои соҳавӣ барои татбиқи барномаҳои давлатии сабзгардонӣ ва беҳтарсозии вазъи экологии мамлакат заминаи устувор фароҳам меорад.

Бояд гуфт, ки дар доираи татбиқи «Барномаи давлатии кабудизоркунии Ҷумҳурии Тоҷикистон барои давраи то соли 2040» дар саросари мамлакат беш аз 2 миллиард бех ниҳоли дарахтони ҳамешасабзу ороишӣ ва сояафкану мевадиҳанда шинонида шуда, Тоҷикистон ба «мамлакати сабз» табдил дода мешавад.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон