НАВРӮЗ — РАМЗИ ДӮСТӢ ВА СУЛҲ БАЙНИ МАРДУМОН. Дар Институти астрофизика ҳамоиш баргузор шуд

ДУШАНБЕ, 18.03.2026 /АМИТ «Ховар»/. 16 март дар Институти астрофизикаи Академияи миллии илмҳои Тоҷикистон   дар мавзуи «Наврӯз – рамзи дӯстӣ ва сулҳ байни халқҳо» ҳамоиш баргузор шуд. Дар ин хусус АМИТ «Ховар» бо истинод ба Академияи миллии илмҳо хабар медиҳад.

Дар ҳамоиш иброз гардид, ки дар эҳё ва рушди анъанаҳои миллӣ, аз ҷумла ҷашни Наврӯз Сарвари давлат муҳтарам Эмомалӣ Раҳмон нақши муҳим гузоштаанд. Дар Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон пешниҳод гардид, ки дар шаҳри Душанбе Маркази байналмилалии Наврӯз бунёд карда шавад, то ба ҳифз, омӯзиш ва тарғиби суннату анъанаҳои Наврӯз ва муаррифии фарҳанги миллӣ мусоидат намояд.

Ҷашни Наврӯз ҳамчун мероси гаронбаҳои фарҳангии ниёгон на танҳо дар байни мардуми тоҷик, балки дар сатҳи байналмилалӣ низ мақоми баланд пайдо намудааст. Наврӯз рамзи эҳёи табиат, оғози фасли баҳор, дӯстиву ҳамдигарфаҳмӣ ва ҳамдилии мардум мебошад.

Иштирокчиён доир ба аҳамияти таърихию фарҳангии Наврӯз мубодилаи афкор намуданд. Таъкид гардид, ки ин ҷашни бостонӣ ба таҳкими дӯстӣ, сулҳ ва ҳамдигарфаҳмии байни халқҳо мусоидат менамояд. Ҳамзамон баргузории чунин чорабиниҳои илмӣ барои омӯзиш, ҳифз ва тарғиби арзишҳои фарҳангии Наврӯз муҳим арзёбӣ гардид.

АКС: Институти астрофизикаи Академияи миллии илмҳои Тоҷикистон