УФУҚҲОИ ДӮСТӢ. Муносибатҳои бародаршаҳрӣ байни Душанбе ва Боку тақвият меёбад

ДУШАНБЕ, 03.03.2026. /АМИТ «Ховар»/. 4 сол пеш, 3 марти соли 2022 дар шаҳри Боку Созишнома дар бораи барқарор намудани муносибатҳои бародаршаҳрӣ байни шаҳри Душанбеи Ҷумҳурии Тоҷикистон ва шаҳри Бокуи Ҷумҳурии Озарбойҷон ба имзо расид.

Ёдовар мешавем, ки 3 марти соли 2022 Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ ба Ҷумҳурии Озарбойҷон сафари расмӣ анҷом доданд. Дар доираи сафари расмӣ дар Озарбойҷон муҳтарам Рустами Эмомалӣ бо сарвари мақомоти иҷроияи шаҳри Боку Элдар Азизов мулоқот намуданд.

Дар оғози суҳбат Рустами Эмомалӣ нақши сиёсати созандаву бунёдкоронаи роҳбарони ду давлат – муҳтарам Эмомалӣ Раҳмон ва муҳтарам Илҳом Алиевро дар тавсеаву тақвияти маҷмӯи муносибатҳои дӯстонаи тарафайн таъкид карданд.

Ҷонибҳо ҷиҳати густариши ҳамкории гуногунҷанбаи шаҳрҳои Душанбе ва Боку, тақвияти корҳо дар самти фароҳам овардани заминаҳои мусоид барои пешбурди фаъолияти тиҷоративу иқтисодӣ, илмиву фарҳангӣ ва сайёҳӣ, инчунин мубодилаи таҷриба байни сохторҳои шаҳрии хоҷагидорӣ ҳавасмандии худро изҳор доштанд.

Дар фарҷоми музокирот Рустами Эмомалӣ ва Элдар Азизов Созишнома дар бораи барқарор намудани муносибатҳои бародаршаҳрӣ байни шаҳри Душанбе ва шаҳри Бокуро ба имзо расониданд.

Хотиррасон мешавем, ки байни шаҳри Душанбе ва зиёда аз 20 шаҳри ҷаҳон, аз ҷумла бо Клагенфурт (Ҷумҳурии Австрия), Боулдер (ИМА), Ройтлинген (Олмон), Давҳа (Давлати Қатар), Исломобод (Ҷумҳурии Исломии Покистон), Остона (Ҷумҳурии Қазоқистон), Лусака (Замбия), Санъо (Ҷумҳурии Яман), Теҳрон (Ҷумҳурии Исломии Эрон), Шероз (Ҷумҳурии Исломии Эрон), Санкт-петербург (Федератсияи Русия), Минск (Беларус), Ашқобод (Туркманистон), Анқара (Ҷумҳурии Туркия) ва шаҳрҳои Урумчӣ, Сямэн, Чиндао ва Музофоти Хайнан (Ҷумҳурии Мардумии Чин) муносибатҳои бародаршаҳрӣ барқарор гардида, ҳамкории мутақобилан судманди шаҳри Душанбе бо бародаршаҳрҳо дар ҳоли рушд қарор дорад.

АКС: АМИТ «Ховар»