Ҳамкории Тоҷикистон бо Бонки Осиёии сармоягузориҳои инфрасохторӣ густариш меёбад

ДУШАНБЕ, 15.04.2026. /АМИТ «Ховар»/. 14 апрел дар доираи ҷаласаҳои солонаи Хазинаи байналмилалии асъор ва Гурӯҳи Бонки ҷаҳонӣ вохӯрии ҳайати расмии Ҷумҳурии Тоҷикистон таҳти роҳбарии муовини якуми Сарвазири Ҷумҳурии Тоҷикистон Ҳоким Холиқзода бо ноиби президент, котиби корпоративии Бонки Осиёии сармоягузориҳои инфрасохторӣ Шерард Каупер-Коулз доир гардид. Дар ин хусус ба АМИТ «Ховар» аз Бонки миллии Тоҷикистон хабар доданд.

Зимни вохӯрӣ ҷонибҳо раванди татбиқи лоиҳаҳои муштарак, аз ҷумла дар соҳаҳои энергетика, нақлиёт ва инфрасохтори иҷтимоиро мавриди баррасӣ қарор доданд. Инчунин саҳми Бонки Осиёии сармоягузориҳои инфрасохториро дар маблағгузории лоиҳаҳои стратегӣ, аз қабили Неругоҳи барқи обии «Роғун», таҷдиди Неругоҳи барқи обии «Норак», сохтмони роҳҳо ва пулҳо муҳим арзёбӣ намуданд.

Иброз гардид, ки густариши ҳамкорӣ дар самтҳои энергетикаи «сабз», рушди инфрасохтори нақлиётӣ, истифодаи устувори захираҳои об ва ҷалби сармоягузориҳои дарозмуддат барои таъмини рушди устувори иқтисодӣ ва тақвияти ҳамгироии минтақавии Тоҷикистон аҳамияти муҳим дорад.

Тоҷикистон дар шароити тағйирёбии муҳити иқтисодии ҷаҳонӣ рушди устувори макроиқтисодиро нигоҳ дошта, татбиқи ислоҳоти сохторӣ ва ҷалби сармоягузориҳои хориҷиро идома медиҳад. Ҳамзамон ҳамкории мутақобили судманд бо шарикони байналмилалии рушд ба татбиқи лоиҳаҳои афзалиятнок, таҳкими суботи иқтисодӣ ва баланд бардоштани сатҳи некуаҳволии аҳолӣ мусоидат менамояд.

АКС: Бонки миллии Тоҷикистон