Бахшида ба 35-солагии Истиқлоли давлатӣ дар ноҳияи Ёвон корҳои созандагӣ идома доранд

  ДУШАНБЕ, 16.04.2026. /АМИТ «Ховар»/.  Бахшида ба 35-солагии Истиқлоли давлатии Ҷумҳурии Тоҷикистон дар ноҳияи Ёвон корҳои созандагию бунёдкорӣ вусъат меёбанд. Бо ин мақсад дар ноҳия бунёди иншооти соҳаи маориф ва роҳу нақлиёт идома дорад. Дар ин хусус ба АМИТ «Ховар» аз Мақомоти иҷроияи ҳокимияти давлатии ноҳияи Ёвон хабар доданд.

Аз ҷумла, бо мақсади беҳтар намудани инфрасохтори роҳу нақлиёт ва фароҳам овардани шароити мусоиди зиндагӣ барои аҳолӣ дар деҳаи Калфи Сабади деҳоти Ситораи Сурх корҳои таъмиру мумфаршкунии роҳи дохили деҳа амалӣ гардиданд.

Дар доираи ин иқдоми муҳим бо ҷалби имконияти маҳаллӣ ва саҳми арзандаи соҳибкорону сокинони ватандӯст зиёда аз як километр роҳ пурра таъмир ва мумфарш карда шуд. Ба иҷрои босифати корҳои сохтмонӣ беш аз 800 ҳазор сомонӣ маблағ равона гардида, роҳ мутобиқ ба талаботи муосир ба истифода дода шуд.

Зимни шиносоӣ бо раванди бунёдкориҳо Раиси ноҳияи Ёвон Икромиддин Вализода иброз намуд, ки татбиқи чунин ташаббусҳо ба беҳтар гардидани сатҳи хизматрасонии нақлиётӣ, осон гардидани рафтуомади сокинон ва рушди иҷтимоию иқтисодии маҳал мусоидат менамояд. Ҳамзамон ин иқдом намунаи равшани ҳамкории судманд байни мақомоти давлатӣ ва ҷомеаи шаҳрвандӣ мебошад.

Дар деҳаи Калфи Сабади деҳоти Ситораи Сурх сохтмони муассисаи таҳсилоти миёнаи умумӣ низ идома дорад. Бунёди чунин иншооти соҳаи маориф дар доираи сиёсати маорифпарваронаи Пешвои миллат муҳтарам Эмомалӣ Раҳмон бо ташаббуси мақомоти иҷроияи ҳокимияти давлатии ноҳия ва саҳми соҳибкорону шахсони ватандӯст амалӣ гардида, ба беҳтар гардидани шароити таълиму тарбия, фароҳам овардани муҳити мусоиди омӯзиш ва баланд бардоштани сатҳи донишандӯзии хонандагон мусоидат менамояд.

АКС: Мақомоти иҷроияи ҳокимияти давлатии ноҳияи Ёвон