Дар Донишгоҳи давлатии ҳуқуқ, бизнес ва сиёсати Тоҷикистон оид ба муаммоҳои глобалии экологӣ ҳамоиш доир шуд

ДУШАНБЕ, 29.04.2026 /АМИТ «Ховар»/. 27 апрел дар Донишгоҳи давлатии ҳуқуқ, бизнес ва сиёсати Тоҷикистон таҳти унвони «Муаммоҳои глобалии экологӣ» ҳамоиши байналмилалӣ баргузор гардид.

Тавре ба АМИТ «Ховар» аз ин донишгоҳ хабар доданд, дар конфронс Сафири Фавқулода ва Мухтори Ҷумҳурии Фаронса Элза Пинёл дар Ҷумҳурии Тоҷикистон ва сенатори Фаронса Эрве Морэ низ иштирок намуданд.

Зимни ҳамоиш иштирокчиён масъалаҳои нақши дипломатияи илмӣ, густариши ҳамкории байналмилалӣ ва роҳҳои ҳалли мушкилоти глобалии экологиро баррасӣ намуданд.

Иброз гардид, ки дар самти ҳалли масъалаҳои об ва иқлим саҳми Президенти Ҷумҳурии Тоҷикистон муҳтарам Эмомалӣ Раҳмон беназир аст.

Сафири Фавқулода ва Мухтори Ҷумҳурии Фаронса дар Ҷумҳурии Тоҷикистон Элза Пинёл зимни маъруза дар мавзуи «Ҳамкории Ҷумҳурии Фаронса бо Ҷумҳурии Тоҷикистон оид ба муаммоҳои обу иқлим» аз таҷрибаи ҳамкории дуҷониба ёдовар шуда, омодагии Фаронсаро барои тавсеаи ҳамкорӣ дар самтҳои идоракунии захираҳои об, ҳифзи муҳити зист ва татбиқи барномаҳои муштарак таъкид намуд.

Ҳамоиш дар фазои илмӣ ва муколамаи созанда баргузор гардид. Ҷонибҳо барои густариши ҳамкории минбаъда дар самти ҳалли муаммоҳои глобалии экологӣ ва таъмини рушди устувор изҳори омодагӣ намуданд.

АКС: Донишгоҳи давлатии ҳуқуқ, бизнес ва сиёсати Тоҷикистон