Дар Тоҷикистон беш аз ҳазор гармхонаи доимамалкунанда фаъолият менамоянд

ДУШАНБЕ, 24.04.2026. /АМИТ «Ховар»/. То аввали моҳи апрел дар Тоҷикистон 1022 гармхонаи доимамалкунанда фаъолият намудааст, ки замини он 190,2 гектарро ташкил медиҳад. Дар ин хусус ба АМИТ «Ховар» аз Вазорати кишоварзии Ҷумҳурии Тоҷикистон иттилоъ доданд.

Дар 152,2 гектари гармхонаҳо кишт гузаронида шудааст, ки аз он помидор 73,0 гектар, бодиринг 35,1 гектар ва дигар сабзавот 42,3 гектарро ташкил медиҳад. Аз замини киштшуда 971,3 тонна сабзавот, аз ҷумла 358,5 тонна помидор, 134,8 тонна бодиринг ва 424,0 тонна дигар сабзавот ҷамъоварӣ карда шудааст.

Ба иттилои мутахасисони соҳаи кишоварзӣ, гармхонаҳои доимамалкунанда навъи гармхонаҳое мебошанд, ки тамоми сол (ҳам дар фасли сармо ва ҳам гармо) барои парвариши растаниҳо истифода мешаванд. Яъне онҳо ба тавре сохта ва таҷҳизонида шудаанд, ки шароити мувофиқи ҳарорат, намӣ ва рӯшноиро ҳамеша нигоҳ медоранд.

Ин гармхонаҳо имкон медиҳанд, ки маҳсулоти кишоварзӣ (масалан, сабзавот, гулҳо) тамоми сол парвариш гардида, бозорҳои истеъмолии мамлакат бо маҳсулоти бештару босифат таъмин карда шаванд.

АКС: АМИТ «Ховар»