Даври шаҳрии Фестивал-озмуни ҷумҳуриявии «Як матову сад ранг» баргузор гардид

ДУШАНБЕ, 22.04.2026. /АМИТ «Ховар»/. Имрӯз бо ташаббуси Мақомоти иҷроияи ҳокимияти давлатии шаҳри Душанбе дар Мактаби бачагонаи санъат ба номи Одина Ҳошим даври шаҳрии Фестивал-озмуни ҷумҳуриявии «Як матову сад ранг» ва намоиш-фурӯши маҳсулоти чакан, нақшдӯзӣ ва зардӯзӣ баргузор гардид, иттилоъ медиҳад АМИТ «Ховар».

Мақсади асосии озмун баланд бардоштани эҳсоси ватандӯстиву хештаншиносӣ, ифтихори миллӣ, тарғиби либоси зебои миллӣ, ҳамгироии минтақаҳои Тоҷикистон, арҷ гузоштан ба таъриху тамаддун, фарҳанг, расму оинҳои миллию мардумӣ ва муаррифии санъату ҳунари волои халқи тоҷик мебошад.

Муовини Раиси шаҳри Душанбе Дилбар Одилзодаиброз намуд, ки баргузории фестивал-озмун бапешгирии бегонапарастию тақлидкорӣ, ҳамоҳангсозӣ ва муаррифии фаъолияти ҳунармандону чеварон, тарроҳон, дизайнерон, эҷодкорон, сӯзанидӯзон, чакандӯзон, гулдӯзон, қаламкашу наққошон мусоидат менамояд.

Дар рафти суханронӣ изҳор гардид, ки Сарвари давлат ба мавқеъ ва ҷойгоҳи занон таваҷҷуҳи хосса зоҳир менамоянд. Президенти Ҷумҳурии Тоҷикистон муҳтарам Эмомалӣ Раҳмон дар Паём ба Маҷлиси Олӣ (16 декабри соли 2025) чун ҳамеша занонро неруи созандаи ҷомеа дониста, бо ишора ба нақши фаъоли онҳо дар ҷомеаи имрӯза эътимоду боварии худро нисбат ба онҳо чунин баён доштанд: «Бовар дорам, ки занону духтаронимамлакат барои тарбияи фарзандон дар руҳияи омӯхтани илму дониш ва касбу ҳунар, риояи қонунҳои миллӣ «Дар бораи танзими ҷашну маросим дар Ҷумҳурии Тоҷикистон» ва «Дар бораи масъулият барои таълиму тарбияи кӯдак», расму ойинҳо ва суннату анъанаҳои мардуми бостонии тоҷик, аз ҷумла сарфаю сариштакорӣ ва пӯшидани либосҳои миллӣ саъю кӯшиши бештар ба харҷ медиҳанд.

Бо эътимоди комил иброз медорам, ки онҳо дар масъалаи муқовимат ба бегонапарастиву хурофот ва исрофкориву зиёдаравӣ дар сафи пеши ҷомеа қарор мегиранд».

Фестивал-озмун тибқи талаботи Низомнома аз рӯи 3 номинатсия доир гардида, аз ҷумла, намоиши либосҳои қадимаи маҳал, рӯзмарра, маросимӣ ва идона, расмӣ, беҳтарин либоси миллии атласу адрас, навъи гуногуни сӯзанидӯзӣ, гулдӯзӣ, зардӯзӣ, порадӯзӣ, читгарӣ, шоҳӣ, атласу адрас, гулбасту алоча, гардӣ, тоқиву ҷӯроб, шероз ва ресмонбофӣ, беҳтарин қаламкаш ва беҳтарин навори видеоӣ оид ба фаъолияти тарроҳону ҳунармандони пойтахт ба роҳ монда, манзури меҳмонон ва иштирокчиёни фестивал гардид.

Дар фарҷоми даври шаҳрии Фестивал-озмуни «Як матову сад ранг» иштирокчиён аз ҷониби роҳбарияти Мақомоти иҷроияи ҳокимияти давлатии шаҳри Душанбе барои иштироки фаъолона бо Диплом, Сипоснома ва туҳфаҳои хотиравӣ қадрдонӣ гардиданд.