Ҳайати Тоҷикистон дар машварати роҳбарони воҳидҳои оперативии вазоратҳои корҳои дохилии давлатҳои ИДМ иштирок намуд

ДУШАНБЕ, 14.05.2026 /АМИТ «Ховар»/. 13 май намояндагони Вазорати корҳои дохилии Ҷумҳурии Тоҷикистон дар машварати роҳбарони воҳидҳои бахши оперативии вазоратҳои корҳои дохилии кишварҳои аъзои Иттиҳоди Давлатҳои Мустақил, ки дар Ҷумҳурии Узбекистон доир шуд, иштирок намуданд.

Тавре ба АМИТ «Ховар» аз Вазорати корҳои дохилии Ҷумҳурии Тоҷикистон хабар доданд, машварат дар мавзуи «Хатарҳо ва таҳдидҳои нав дар соҳаи гардиши ғайриқонунии воситаҳои нашъадор дар қаламрави кишварҳои аъзои Иттиҳоди Давлатҳои Мустақил» баргузор гардид.

Иштирокчиён зимни машварат масъалаҳои мубодилаи таҷрибаи пешқадам ва татбиқи роҳкорҳои инноватсионӣ дар самти мубориза бар зидди гардиши ғайриқонунии воситаҳои нашъадор дар кишварҳои аъзои Иттиҳоди Давлатҳои Мустақил, татбиқи онҳо дар фаъолияти амалии мақомоти ҳифзи ҳуқуқ, инчунин татбиқи чораҳои ҳамоҳангшуда бар зидди интернет-провайдерҳо ва дигар захираҳои интернетиеро, ки барои паҳн намудани воситаҳои нашъадор истифода мешаванд, мавриди баррасӣ қарор доданд.

Ҷонибҳо масъалаҳои таҳияи воситаҳои барномавию техникӣ, табодули таҷрибаи амалӣ байни кормандони сохторҳои мубориза бар зидди муомилоти ғайриқонунии воситаҳои нашъадор ва лоиҳаи нақшаи чорабиниҳо оид ба рушди ҳамкории вазоратҳои корҳои дохилии кишварҳои аъзои Иттиҳоди Давлатҳои Мустақилро баррасӣ намуданд.

Дар анҷоми машварат барои таҳкими муқовимати дастҷамъона бар зидди таҳдиду хатарҳои муосир дар самти гардиши ғайриқонунии воситаҳои нашъадор ва роҳҳои пешгирии онҳо қарорҳои дахлдор қабул карда шуданд.

АКС: Вазорати корҳои дохилии Ҷумҳурии Тоҷикистон