«ҶАВОНОН — МУАРРИФИ ФАРҲАНГИ МИЛЛӢ». Дар Бохтар бахшида ба Рӯзи ҷавонон ҳамоиши идона баргузор гардид

ДУШАНБЕ, 23.05.2026 /АМИТ «Ховар»/. 22 май бо ташаббуси Кумитаи иҷроияи Ҳизби Халқии Демократии Тоҷикистон дар вилояти Хатлон дар доираи «Моҳвораи ҷавонон» бахшида ба Рӯзи ҷавонони Тоҷикистон ва Рӯзи ҷаҳонии футбол чорабинии фарҳангӣ — фароғатӣ баргузор гардид. Дар ин хусус ба АМИТ «Ховар» аз Кумитаи иҷроияи Ҳизби Халқии Демократии Тоҷикистон дар вилояти Хатлон хабар доданд.

Чорабинии фарҳангӣ-фароғатӣ дар майдони Ҷалолиддини Балхии шаҳри Бохтар бо иштироки масъулини Кумитаи иҷроияи Ҳизби Халқии Демократии Тоҷикистон дар вилояти Хатлон ва Раёсати ҷавонон ва варзиши вилоят доир шуд.

Раиси Кумитаи иҷроияи Ҳизби Халқии Демократии Тоҷикистон дар вилояти Хатлон Ҷамшед Саидзода иброз дошт, ки «мо, роҳбарон ва аъзои Ҳизби Халқии Демократии Тоҷикистон ифтихор мекунем, ки аз шумораи умумии ҳамсафони мо 35 фисадашро ҷавонон ташкил медиҳанд. Онҳо дар баробари таҳсилу илмомӯзӣ, ҳамчунин дар ҳама соҳаҳо фаъолияти арзанда дошта, дар озмунҳои ҷумҳуриявии «Илм — фурӯғи маърифат», «Фурӯғи субҳи доноӣ китоб аст», «Тоҷикистон — Ватани азизи ман» ва дигар маҳфилу чорабиниҳо фаъолона иштирок менамоянд».

«Пайи ҳам ҷашн гирифтани Рӯзи ҷавононон ва Рӯзи ҷаҳонии футбол рамзи хоси худро дорад. Зеро бештари дӯстдорони футбол наврасону ҷавонон мебошанд. Наврасону ҷавонони мо бояд аз имтиёзҳои фароҳамовардаи давлату ҳукумати мамлакат самаранок истифода намуда, барои рушди футболи ватанӣ саҳми назаррас гузоранд»,-афзуд Ҷамшед Саидзода .

Дар ҳошияи ҳамин чорабинӣ аз ҷониби Кумитаи иҷроияи Ҳизби Халқии Демократии Тоҷикистон аксияи «Як тӯб, садҳо орзу» баргузор гардида, ба ҷавонон бо таманнои «Тоҷикистон, ба пеш!» тӯби футбол тақдим карда шуд.

Сардори Раёсати ҷавонон ва варзиши вилояти Хатлон Рамазон Насриддинзода фаъолияти густурда, иқдомҳои наҷибу созандаи аъзои ҷавони ҳизбро ёдовар шуда, таъкид кард, ки ҷавонон дар ҳама давру замон неруи пешбарандаи ҷомеа маҳсуб ёфта бо илму дониш ва фаъолияти созандаашон дар пешрафти ҷомеа саҳми бориз мегузоранд.

Дар қисми фарҳангии чорабинӣ аз ҷониби ҷавонони ҳунарманд ва ҳаҷвнигорони хушзавқи дастаҳои ҳунарӣ барномаи рангини консертӣ пешниҳод гардид.

АКС: Кумитаи иҷроияи Ҳизби Халқии Демократии Тоҷикистон дар вилояти Хатлон