Дар Душанбе Форуми байналмилалии «Занон ва об» оғоз гардид

ДУШАНБЕ, 25.05.2026 /АМИТ «Ховар»/. Имрӯз дар шаҳри Душанбе дар доираи чорабиниҳои канории Конфронси чоруми байналмилалии сатҳи баланд оид ба Даҳсолаи байналмилалии амал «Об барои рушди устувор, солҳои 2018–2028», ки аз 25 то 28 май баргузор мегардад, таҳти унвони «Занон ва об–2026»– форуми байналмилалӣ оғоз ёфт, иттилоъ медиҳад мухбири АМИТ «Ховар» аз ҷараёни баргузории ин чорабинӣ.

Дар кори форум роҳбарони мақомоти давлатӣ, вазорату идораҳо, намояндагони созмонҳои байналмилалӣ ва минтақавии муассисаҳои молиявии рушд, ҷомеаи илмӣ, ниҳодҳои гендерӣ ва ҳуқуқӣ иштирок доранд.

Дар оғози форум муовини Сарвазири Ҷумҳурии Тоҷикистон Дилрабо Мансурӣ иброз дошт, ки ҳадафи асосии форум таъсиси платформаи байналмилалии сатҳи баланд барои бартараф намудани нобаробарӣ дар соҳаи об, тақвияти иштироки занон дар қабули қарорҳо ва таҳкими нақши онҳо дар маблағгузорӣ ва татбиқи инноватсияҳо дар бахши об мебошад.

Барномаи форум аз се ҷаласаи панелӣ иборат мебошад. Зимни ҷаласаҳо масъалаҳои таъсиси механизмҳои мақсадноки молиявӣ барои занони соҳибкор, инчунин ҷорӣ намудани технологияҳои рақамӣ, аз ҷумла зеҳни сунъӣ барои қонеъ намудани ниёзҳои хоси занон мавриди баррасӣ қарор мегиранд.

Иштирокчиён ҳамчунин масоили ҳамгироии баробарии гендериро ба стратегияҳои миллии об, механизмҳои идоракунии захираҳои об дар ҳама сатҳҳо, ҳамкории минтақавию байналмилалӣ ва илмӣ оид ба ҳифзи пиряхҳо ва таҳкими ҳамкории фаромарзӣ муҳокима менамоянд.

Натиҷаи асосии форум қабули Эъломияи Душанбе «Занон ва об» мебошад, ки ба рӯзномаи конфронси дарпешистодаи Созмони Милали Муттаҳид оид ба об дар соли 2026 саҳми арзанда мегузорад.
Танҳо дар доираи форум ба фаъолияти Шабакаи шарикии «Занон ва об» ҳусни оғоз бахшида, таҳияи нақшаи муштараки амали минтақавӣ байни Кумитаи кор бо занон ва оилаи назди Ҳукумати Ҷумҳурии Тоҷикистон ва сохтори «Созмони Милали Муттаҳид-занон» оид ба идоракунии ба гендер нигаронидаи захираҳои об дар Осиёи Марказӣ дар назар аст.

Ёдовар мешавем, ки Конфронси чоруми байналмилалии сатҳи баланд оид ба Даҳсолаи байналмилалии «Об барои рушди устувор, солҳои 2018-2028» аз 25 то 28 май дар пойтахти Тоҷикистон-шаҳри Душанбе баргузор мешавад.

Бояд гуфт, ки дар сатҳи миллӣ аз соли 2018 то имрӯз дар шаҳри Душанбе дар ҳамкорӣ бо Созмони Милали Муттаҳид се Конфронси байналмилалии сатҳи баланд (солҳои 2018, 2022 ва 2024) баргузор гардиданд. Ин силсилаконфронсҳо, ки «Раванди оби Душанбе» ном гирифтаанд, ба майдони устувор барои баррасии масъалаҳои вобаста ба захираҳои об, санитария ва тағйирёбии иқлим табдил ёфтаанд.

Моҳинави НАВРӮЗ,
АМИТ «Ховар»

АКС: АМИТ «Ховар