Дар Ҳисор даври шаҳрии Озмуни ҷумҳуриявии «Фурӯғи субҳи доноӣ китоб аст» оғоз шуд

ДУШАНБЕ, 05.05.2026. /АМИТ «Ховар»/. Дар шаҳри Ҳисор даври шаҳрии Озмуни ҷумҳуриявии «Фурӯғи субҳи доноӣ китоб аст», ки ҳамасола таҳти сарпарастии Президенти Ҷумҳурии Тоҷикистон муҳтарам Эмомалӣ Раҳмон баргузор мегардад, оғоз шуд.

АМИТ «Ховар» бо истинод ба Мақомоти иҷроияи ҳокимияти давлатии шаҳри Ҳисор иттилоъ медиҳад, ки зимни ифтитоҳи озмун роҳбарияти шаҳр ҳакамонро ба озоду шаффоф баҳогузорӣ намудан ба лаёқати довталабон ҳидоят намуданд.

Дар даври якуми озмун, ки дар ҷамоатҳои шаҳраку деҳот баргузор гардид, зиёда аз 20 ҳазор дӯстдорони каломи бадеъ иштирок карда, беш аз 2 000 нафар беҳтаринҳо ба даври шаҳрии озмун роҳхат гирифтанд.

Бояд гуфт, ки «Фурӯғи субҳи доноӣ китоб аст» озмуни ҷумҳуриявии китобхонӣ дар Тоҷикистон буда, бо ибтикор ва сарпарастии Президенти Ҷумҳурии Тоҷикистон муҳтарам Эмомалӣ Раҳмон аз соли 2019 инҷониб бо мақсади ташвиқ ба китобхонӣ, рушди маърифати наврасону ҷавонон ва аҳолӣ гузаронида мешавад.

Ҳадафҳои асосии Озмуни ҷумҳуриявии «Фурӯғи субҳи доноӣ китоб аст» баланд бардоштани завқи китобхонӣ, тақвияти неруи зеҳнӣ, дарёфти чеҳраҳои нави суханвару сухандон, арҷ гузоштан ба арзишҳои миллию фарҳангӣ, инкишофи қобилияти эҷодӣ, таҳкими эҳсоси худогоҳию худшиносӣ, такмили захираи луғавӣ ва тақвияти ҷаҳони маънавӣ дар байни аҳолии мамлакат мебошад.

Дар озмун ҳамасола хонандагони муассисаҳои таҳсилоти миёнаи умумӣ, хонандагон ва донишҷӯёни муассисаҳои таҳсилоти ибтидоӣ, миёна ва олии касбӣ, баъд аз муассисаҳои таҳсилоти касбӣ -магистрҳо, аспирантҳо, докторантҳо, омӯзгорони ҳама зинаҳои таҳсилот, ходимони илмию адабии муассисаҳои илмиву эҷодӣ, фарҳангу санъат, калонсолон, намояндагони касбу кори гуногун ва дигар табақаҳои аҳолии мамлакат фаъолона иштирок намуда, ҷойҳои ифтихориро касб менамоянд.

АКС: Мақомоти иҷроияи ҳокимияти давлатии шаҳри Ҳисор