Дар ноҳияи Рӯдакӣ даври ноҳиявии Озмуни ҷумҳуриявии «Илм — фурӯғи маърифат» оғоз шуд

РӮДАКӢ, 25.05.2026 /АМИТ «Ховар»/. 23 май дар Муассисаи таҳсилоти миёнаи умумии рақами 5-и ноҳияи Рӯдакӣ бо иштироки хонандагон ва донишҷӯёни муассисаҳои таълимӣ  ва миёнаи касбӣ даври ноҳиявии Озмуни ҷумҳуриявии «Илм–фурӯғи маърифат» оғоз гардид. Дар ин хусус ба хабарнигори минтақавии АМИТ «Ховар» аз Мақомоти иҷроияи ҳокимияти давлатии ноҳияи Рӯдакӣ  иттилоъ доданд.

Дар даври ноҳиявии озмуни «Илм-фурӯғи маърифат»  700  хонанда ва донишҷӯёни муассисаҳои таҳсилоти миёнаи умумӣ ва миёнаи касбии ноҳия аз рӯйи 8 номинатсия — математика (арифметика, алгебра, геометрия), физика ва астраномия, химия, биология (ботаника, зоология, анатомия), география, технологияи иттилоотӣ, зеҳни сунъӣ ва барномасозӣ, ихтироъкорӣ ва навоварӣ рақобат мекунанд.

Ба маҳорати иштирокчиён аз рӯйи донишҳои назариявӣ, фаҳмиши моҳияти ҳодисаҳо ва равандҳои табиат, ҳалли масъалаҳои амалӣ ва намоиши дастовардҳои илмӣ ва навовариҳо баҳо гузошта мешавад.

Муовини Раиси ноҳияи Рӯдакӣ Зарина Исмоилзода ба аҳли маориф, омӯзгорон ва хонандагон  барои иштироки фаъолона дар озмун ва омӯзиши ҷиддии фанҳои риёзӣ, дақиқ ва табиатшиносӣ муваффақият орзу карда, иброз дошт, ки баргузории чунин озмунҳо ба татбиқи амалии «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» (2020-2040) мусоидат намуда, дар кашф ва рушду такмили истеъдодҳои нав нақши муҳим мебозад. Дар замони пешрафти илму техника ва технологияҳои муосир таҳкими ҷаҳонбинии илмӣ ва тарбияи насли соҳибмаърифат яке аз вазифаҳои асосии ҷомеа ба шумор меравад.

Ёдовар мешавем, ки ҳадафи Озмуни ҷумҳуриявии «Илм – фурӯғи маърифат», ки бо Амри Президенти Ҷумҳурии Тоҷикистон гузаронида мешавад, рушди тафаккури техникӣ, васеъ намудани ҷаҳонбинии илмӣ, дастрасӣ пайдо кардан ба техникаву технология, тавсеаи ихтироъкорию навоварӣ, пайвасти илм бо истеҳсолот, ҷалби бештари донишҷӯён ба омӯзиши фанҳои риёзӣ, дақиқ ва табиӣ, ҳамчунин дарёфти истеъдодҳои нав дар ин самтҳо байни донишҷӯён, магистрон, аспирантон, докторантон аз рӯи ихтисос (PhD), унвонҷӯён ва омӯзгорон мебошад.

АКС: Мақомоти иҷроияи ҳокимияти давлатии ноҳияи Рӯдакӣ