Дар шаҳри Гулистон Озмуни шаҳрии «Оилаи намунавӣ» баргузор гардид

ДУШАНБЕ, 05.05.2026 /АМИТ «Ховар»/.  Дар шаҳри Гулистони вилояти Суғд Озмуни шаҳрии «Оилаи намунавӣ» баргузор гардид. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии шаҳри Гулистон хабар медиҳад.

Дар озмун иштирокчиёни аз 20 то 55-сола ва оилаҳои намунавӣ аз ҷамоату шаҳраки  ноҳия иштирок намуданд. Иштирокчиён дар бораи собиқаи оиладорӣ, маҳорату фарҳанги оиладорӣ, тарбияи фарзандон, ҳифзи анъанаҳои миллӣ дар раванди оиладорӣ ва дастовардҳои оилавияшон суҳбат намуданд.

Иброз гардид, ки оила дар фарҳанги куҳанбунёди тоҷик ҳамчун ниҳоди муқаддас эътироф гардидааст, зеро беҳтарин арзишҳои инсонӣ, аз қабили муҳаббату садоқат, самимияту вафодорӣ ва ҳамдигарфаҳмию таҳаммулгароӣ маҳз дар оила ташаккул меёбанд.

Мақсади баргузории озмун гиромидошти арзишҳои оиладорӣ, арҷгузорӣ ба фарҳанги оиладорӣ, таҳкими оила, бунёд ва мустаҳкамсозии муносибатҳои оилавӣ дар заминаи меҳру муҳаббату эҳтироми якдигар ва баланд бардоштани масъулияти оила дар тарғиби фарҳанги оиладорӣ мебошад.

Ҳамасола баргузор намудани озмунҳои гуногун дар сатҳи вилоят, шаҳр, ноҳия ва ҷумҳурӣ ба пойдории оилаҳо мусоидат менамояд. Яке аз чунин озмунҳо Озмуни ҷумҳуриявии «Оилаи намунавӣ» мебошад.

Барои иштирокчиёни озмуни шаҳрӣ дастархони идона ороста шуда, ба оилаҳои намунавӣ туҳфаҳои хотиравӣ тақдим карда шуданд.

Ёдовар мешавем, ки Озмуни ҷумҳуриявии «Оилаи намунавӣ» бо ибтикори Кумитаи кор бо занон ва оилаи назди Ҳукумати Ҷумҳурии Тоҷикистон имрӯзҳо дар шаҳру ноҳияҳои мамлакат доир карда мешавад.

АКС: Мақомоти иҷроияи ҳокимияти давлатии шаҳри Гулистон