Дар Тоҷикистон нақшаи даъвати баҳорӣ ба сафи Қувваҳои Мусаллаҳ 100 фоиз иҷро шуд

ДУШАНБЕ, 25.05.2026 /АМИТ «Ховар»/. Нақшаи даъвати баҳории шаҳрвандон ба сафи Қувваҳои Мусаллаҳи Ҷумҳурии Тоҷикистон пеш аз муҳлати муайянгардида 100 фоиз иҷро гардид. Дар ин хусус АМИТ «Ховар» бо истинод ба Раёсати иттилоот ва робита бо ҷомеаи Вазорати мудофиаи Ҷумҳурии Тоҷикистон хабар медиҳад.

Ба иттилои манбаъ, бо оғоз гардидани даъвати баҳории шаҳрвандон ба хизмати ҳарбӣ нахустин шуда дар ҷумҳурӣ шаҳру ноҳияҳои Вилояти Мухтори Кӯҳистони Бадахшон нақшаи пешбинигардидаро дар рӯзи якум иҷро намуданд. Дар баробари дигар шаҳру ноҳияҳои ҷумҳурӣ шаҳри Душанбе ва шаҳру ноҳияҳои вилояти Хатлон низ аз аввалинҳо шуда, нақшаи пешбинишударо пурра ба анҷом расониданд.

Масъулини вобастагардидаи даъват дар шаҳру ноҳияҳои тобеи ҷумҳурӣ ва вилояти Суғд низ сари вақт ин маъракаи муҳими сиёсиро ба анҷом расониданд.

Дар шаҳру ноҳияҳое, ки масъулини мақомоти иҷроияи ҳокимияти давлатӣ ба ин маъракаи муҳими сиёсӣ таваҷҷуҳи хосса зоҳир намуданд, сатҳу сифати чорабиниҳои даъватӣ ва гусели шаҳрвандон ба хизмати ҳатмии ҳарбӣ хуб ба назар мерасад.

АКС: Раёсати иттилоот ва робита бо ҷомеаи Вазорати мудофиаи Ҷумҳурии Тоҷикистон