Донишҷӯёни Коллеҷи омори шаҳри Ваҳдат дар озмунҳои ҷумҳуриявӣ фаъолона иштирок менамоянд

ДУШАНБЕ, 06.05.2026. /АМИТ «Ховар»/. Донишҷӯёни Коллеҷи омори шаҳри Ваҳдат дар озмунҳои ҷумҳуриявӣ ва соҳавӣ иштироки фаъолона намуда, барои баланд бардоштани сатҳи дониш, рушди тафаккури эҷодӣ ва тақвияти малакаҳои касбӣ саҳми назаррас мегузоранд.

Зимни мулоқот бо донишҷӯёну омӯзгорон директори Коллеҷ Исломбек Зоирзода таъкид намуд, ки дар муассиса ба омода намудани мутахассисони рақобатпазир таваҷҷуҳи хоса зоҳир гардида, донишҷӯён ба аз худ намудани донишҳои муосир, иштироки фаъолона дар ҳаёти ҷамъиятӣ ва рушди қобилияти илмӣ ҳидоят карда мешаванд.

Аз ҷумла, аз донишҷӯён даъват карда шуд, ки дар озмунҳои ҷумҳуриявӣ, аз қабили «Илм – фурӯғи маърифат», «Фурӯғи субҳи доноӣ китоб аст» ва «Тоҷикистон – ватани азизи ман» фаъолона иштирок намуда, инчунин осори Пешвои миллат ва «Шоҳнома»-ро ҳамчун омили муҳимми боло бурдани маърифати фарҳангиву таърихии ҷавонон мутолиа намоянд.

Изҳор карда шуд, ки иштироки донишҷӯён дар олимпиадаҳои фаннӣ, ки аз ҷониби Кумита оид ба таҳсилоти ибтидоӣ ва миёнаи касбии назди Ҳукумати Ҷумҳурии Тоҷикистон аз рӯи фанҳои гуногун баргузор мешаванд, низ сол то сол фаъолтар гардида, ба рушди неруи зеҳнии онҳо мусоидат менамояд.

Роҳбарияти муассиса ҷиҳати фароҳам овардани шароити мусоид барои таҳсил ва иштироки ҷавонон дар чунин озмунҳо тадбирҳои заруриро амалӣ намуда, дастгирии пайвастаро таъмин менамояд.