«ИЛМ — ФУРӮҒИ МАЪРИФАТ». Дар шаҳри Бӯстон даври шаҳрии озмуни ҷумҳуриявӣ баргузор гардид

ДУШАНБЕ, 29.05.2026 /АМИТ «Ховар»/. Дар Донишкадаи кӯҳию металлургии Тоҷикистон, воқеъ дар шаҳри Бӯстони вилояти Суғд даври шаҳрии Озмуни ҷумҳуриявии «Илм — фурӯғи маърифат» бо иштироки васеи хонандагону ҷавонони болаёқат баргузор гардид. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии шаҳри Бӯстон хабар медиҳад.

Дар чорабинӣ иброз гардид, ки Озмуни ҷумҳуриявии «Илм — фурӯғи маърифат» бо ташаббуси Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон доир шуда, ҳадафи асосии он рушди тафаккури техникӣ, тақвияти ҷаҳонбинии илмӣ, ҷалби наврасону ҷавонон ба омӯзиши фанҳои дақиқ ва табиӣ, инчунин дарёфт ва дастгирии истеъдодҳои нав мебошад.

«Имрӯз ҷомеа ба ҷавонони донишманд, соҳибкасб ва дорои ҷаҳонбинии муосир ниёз дорад. Таъкид гардид, ки таваҷҷуҳи давлату Ҳукумат ба рушди илму маориф барои ҷавонон имконияти васеъ фароҳам оварда, онҳоро ба омӯзиши илмҳои муосир ва навоварӣ ҳидоят менамояд», — гуфта шуд дар чорабинӣ.

Озмун аз рӯйи номинатсияҳои гуногун баргузор гардида, иштирокчиён аз рӯйи номинатсияҳои математика, физика, химия, биология, технологияи иттилоотӣ, география, зеҳни сунъӣ ва ихтироъкорӣ маҳорат месанҷанд.

АКС: Мақомоти иҷроияи ҳокимияти давлатии шаҳри Бӯстон