Таҳти унвони «Нақши зеҳни сунъӣ дар рушди Қувваҳои Мусаллаҳ» конференсияи ҷумҳуриявии илмӣ-ҳарбӣ доир шуд

ДУШАНБЕ, 31.05.2026 /АМИТ «Ховар»/.  Дар Вазорати мудофиаи Ҷумҳурии Тоҷикистон таҳти унвони «Нақши зеҳни сунъӣ дар рушди Қувваҳои Мусаллаҳ» конференсияи ҷумҳуриявии илмӣ-ҳарбӣ баргузор гардид. Дар ин хусус ба АМИТ «Ховар» аз Вазорати мудофиаи Ҷумҳурии Тоҷикистон хабар доданд.

Сардори Ситоди генералии Қувваҳои Мусаллаҳ, муовини якуми Вазири мудофиаи Тоҷикистон Бобоҷон Саидзода иброз дошт, ки истифодаи технологияҳои муосир, бахусус зеҳни сунъӣ дар шароити ҷаҳонишавӣ ва рушди босуръати техникаю технология ба яке аз омилҳои муҳими таҳкими иқтидори мудофиавии давлат табдил ёфтааст. Ҷорӣ намудани чунин технологияҳо метавонад самаранокии идоракунӣ, таҳлил ва банақшагирии низоми амниятиро ба маротиб баланд бардорад.

Аз ҷониби коршиносони соҳа вобаста ба ҷанбаҳои гуногуни истифодаи зеҳни сунъӣ дар фаъолияти Қувваҳои Мусаллаҳ маърузаҳои илмӣ пешниҳод гардиданд. Дар баромадҳо масъалаҳои татбиқи технологияҳои рақамӣ, таҳияи системаҳои интеллектуалӣ, таҳлили иттилоот ва истифодаи онҳо дар соҳаҳои гуногуни амниятиву мудофиавӣ мавриди баррасӣ қарор гирифтанд.

Дар ҷараёни конференсия таъкид карда шуд, ки Қувваҳои Мусаллаҳи Ҷумҳурии Тоҷикистон ҳамчун сипари боэътимоди давлату ҳукумат бояд дар баробари рушди замони муосир аз имконоти пешрафтаи илм ва технология, аз ҷумла зеҳни сунъӣ васеъ истифода намуда, сатҳи омодабошии ҷангӣ ва касбияти ҳайати шахсиро боз ҳам баланд бардоранд.

АКС: Вазорати мудофиаи Ҷумҳурии Тоҷикистон