Ҷавонони Тоҷикистон дар Форуми 6-уми «Сарварони ҷавони эҷодкори Осиёи Марказӣ ва Русия» иштирок менамоянд

ДУШАНБЕ, 23.06.2026 /АМИТ «Ховар»/. Аз 24 то 28 июн дар шаҳри Омски Федератсияи Русия Форуми 6-уми «Сарварони ҷавони эҷодкори Осиёи марказӣ ва Русия» баргузор мегардад. Тавре АМИТ «Ховар» хабар медиҳад, дар форум ҷавонони кишварҳои Осиёи Марказӣ, аз ҷумла Ҷумҳурии Тоҷикистон иштирок менамоянд.

Мақсад аз баргузории ин форум таҳкими робитаҳои фарҳангӣ, эҷодӣ ва башардӯстона байни ҷавонони Русия ва кишварҳои Осиёи Марказӣ мебошад. Ҳамчунин чорабинӣ барои фароҳам овардани шароит ҷиҳати муколамаи байнифарҳангӣ ва дастгирии ҷавонони боистеъдоди эҷодкор мусоидат хоҳад намуд.

Барномаи форум аз чорабиниҳои гуногун, аз ҷумла муҳокимаҳои панелӣ ва лексияҳо бо иштироки коршиносон, намояндагони мақомоти давлатӣ ва намояндагони ҷамъиятӣ аз Русия ва кишварҳои Осиёи Марказӣ иборат мебошад.

Илова бар ин, барномаи таълимӣ дар самтҳои «Объектив бе сарҳад» («Объектив без границ»), «Муколама дар рангҳо» («Диалог в красках»), «Корвони кулинарӣ» («Кулинарный караван») ва «Рамзи ваҳдат» («Код единства») пешбинӣ шудааст.

Дар доираи форум ҳамчунин барномаи фарҳангӣ бо ташкили экскурсияҳо ба иншооти калидии фарҳангӣ ва сиёсати ҷавонони вилояти Омск дар назар аст.

АКС аз манбаъҳои боз