Кумитаи Иҷроияи Марказии ҲХДТ бахшида ба Рӯзи Ваҳдати миллӣ ҳамоиши сиёсӣ баргузор намуд

ДУШАНБЕ, 26.06.2026 /АМИТ «Ховар»/. Бахшида ба 29-умин солгарди Рӯзи Ваҳдати миллӣ бо ибтикори Кумитаи Иҷроияи Марказии Ҳизби Халқии Демократии Тоҷикистон таҳти унвони «Ваҳдате,  ки халқи моро шод ва мулки моро обод кард» ҳамоиши сиёсӣ баргузор гардид. Дар ин хусус ба АМИТ «Ховар» аз Кумитаи Иҷроияи ҲХДТ хабар доданд.

Муовини якуми Раиси Ҳизби Халқии Демократии Тоҷикистон Маликшо Неъматзода иброз дошт, ки «Ваҳдати миллӣ,  воқеан дастоварди беназири миллати тоҷик аст, ки маҳз ба шарофати талошҳои пайгиронаву созандаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба халқи Тоҷикистон муяссар гардидааст. Маҳз дар партави сиёсати дурбинонаи Сарвари давлат кулли соҳаҳои иқтисоди мамлакат рушд намуда, Тоҷикистон ба давлати ташаббускор дар пешбурди рӯзномаи ҷаҳонии марбут ба обу иқлим эътироф гардид».

Гуфта шуд, ки таҳкими дастовардҳои истиқлолият, пояҳои давлатдории миллӣ, пуштибонии амнияту суботи сиёсӣ, татбиқи ҳадафҳои стратегӣ, тақвияти иқтидори иқтисодиву иҷтимоӣ, хулоса рушди рӯзафзуни Тоҷикистон маҳз аз фазои сулҳу субот ва ваҳдати миллӣ вобаста мебошад.

Таъкид  гардид, ки Ваҳдати миллӣ барои ҳар як тоҷики ватандӯст ва бонангу номус муқаддастарин ҷашн ба ҳисоб меравад, зеро ин иди сулҳу оромӣ, осудагию ҳамдигарфаҳмӣ ва таҳаммулпазирӣ  аст. Ҳар як шаҳрванд бояд дарк намояд, ки ҳам рушди ҷомеа ва ҳам амалишавии орзую манфиатҳои шахсии ӯ фақат дар сурати сулҳу ваҳдат имконпазир мебошад. Ҳар яки мо вазифадорем, ки ваҳдати миллиро  онро мисли гавҳараки чашм ҳифзу нигаҳдорӣ намоем.

АКС: Кумитаи Иҷроияи Марказии Ҳизби Халқии Демократии Тоҷикистон