РӮЗИ КОРМАНДОНИ МАҚОМОТИ НАЗОРАТИ МАВОДИ НАШЪАОВАР. Ба ин муносибат ҷаласаи тантанавӣ баргузор гардид

ДУШАНБЕ, 01.06.2026 /АМИТ «Ховар»/. Имрӯз дар Агентии назорати маводи нашъаовари назди Президенти Ҷумҳурии Тоҷикистон бахшида ба Рӯзи кормандони мақомоти назорати маводи нашъаовар ҷаласаи тантанавӣ баргузор гардид. Дар ин хусус ба АМИТ «Ховар» аз ин агентӣ хабар доданд.

Дар ҷаласа гуфта шуд, ки мутобиқи Қонуни Ҷумҳурии Тоҷикистон «Дар бораи рӯзҳои ид» 1 июн Рӯзи кормандони мақомоти назорати маводи нашъаовар эълон гардидааст. 27 сол муқаддам, дар ин рӯз Агентии назорати маводи нашъаовари назди Президенти Ҷумҳурии Тоҷикистон дар доираи таъмини иҷрои дастуру супоришҳои Сарвари давлат муҳтарам Эмомалӣ Раҳмон таъсис дода шуд, ки тӯли ин солҳо рисолати худро дар пешгирӣ ва мубориза бар зидди хатари ҷиддии глобалӣ – нашъамандӣ, мубориза бо муомилоти ғайриқонунии воситаҳои нашъадор, моддаҳои психотропӣ ва прекурсорҳои онҳо самаранок иҷро менамояд.

«Таъсиси Агентӣ ба афзоиши бесобиқаи ҳаҷми мусодираи маводи мухаддир дар мамлакат мусоидат намуда, миллионҳо нафар дар кишварҳои гуногуни ҷаҳон аз нашъамандӣ наҷот ёфта, ҷиноятҳои сершумори вобаста ба маводи мухаддир пешгирӣ карда шуд»,-изҳор гардид дар ҷаласа.

Дар ҷаласа натиҷаҳои фаъолияти агентӣ дар давраи сипаригардида ҷамъбаст гардида, оид ба дастовардҳо дар самти муқовимат ба гардиши ғайриқонунии маводи мухаддир, рушди ҳамкории байналмилалӣ ва таҳкими иқтидори кадрии мақомот ибрози назар гардид.

Директори агентӣ Зафар Самад ба ҳайати шахсӣ барои хизмати содиқона, маҳорати баланди касбӣ, садоқат ба касб ва саҳми арзандаашон дар таъмини амнияти давлат ва ҷомеа изҳори сипос намуд.

Дар ҷамъомад ба як қатор кормандони фаъол мукофотҳои соҳавӣ, Ифтихорнома ва Сипоснома тақдим карда шуданд.

АКС: Агентии назорати маводи нашъаовари назди Президенти Ҷумҳурии Тоҷикистон