Самтҳои афзалиятноки ҳамкории Бонки миллии Тоҷикистон бо Агентии рейтингии байналмилалии «Moody’s» муҳокима шуд

ДУШАНБЕ, 10.06.2026 /АМИТ «Ховар»/. Ҳамкории судманд бо Агентии рейтингии байналмилалии «Moody’s» дар таҳкими эътимоди ҷомеаи байналмилалии молиявӣ ба иқтисоди Тоҷикистон нақши муҳим дорад. Ин матлаб дар мулоқоти муовини раиси Бонки миллии Тоҷикистон Далер Муродализода бо ноиби Президенти гурӯҳи тиҷоратӣ ва роҳбари намояндагии Агентии рейтингии байналмилалии «Moody’s Ratings» дар Осиёи Марказӣ Алма Карабасова, ки дар шаҳри Душанбе баргузор шуд, баён гардид.

Тавре АМИТ «Ховар» бо истинод ба Бонки миллии Тоҷикистон хабар медиҳад, дар мулоқот масъалаҳои ҳамкории мутақобила, арзёбии рейтинги кредитии соҳибихтиёрии Тоҷикистон ва вазъи кунунии бахши молиявии ҷумҳурӣ баррасӣ гардиданд.

Дар идома аз ҷониби ноиби Президенти гурӯҳи тиҷоратӣ ва роҳбари намояндагии «Moody’s Ratings» дар Осиёи Марказӣ Алма Карабасова дар мавзуи методологияи гузаронидани рейтинг ва омилҳои асосии муайянкунии рейтинг, аз ҷумла аз рӯйи нишондиҳандаҳои суботи молиявӣ, сиёсати фискалӣ, суботи институтсионалӣ ва хавфҳои эҳтимолии ҳолатҳои ғайричашмдошт, инчунин оид ба фаъолияти ширкат, фарогирии хизматрасониҳои он дар кишварҳои Осиёи Марказӣ ва имкониятҳои ҳамкорӣ дар самти баҳогузории қарзӣ рӯнамоии муфассал манзури ҳозирин гардонида шуд.

Гуфта шуд, ки «Moody’s» ба ташкилотҳои қарзӣ ва суғуртавӣ доираи васеи хизматрасониҳои рейтингӣ ва таҳлилӣ пешниҳод намуда, дар таҳкими шаффофият, идоракунии хавфҳо ва ҷалби сармоягузорӣ ба бахши молиявӣ саҳм мегузорад.

Дар мулоқот роҳбарони сохторҳои дахлдори Бонки миллии Тоҷикистон иштирок намуда, оид ба маводи рӯнамоишуда ва самтҳои алоҳидаи муайянкунии нишондиҳандаҳои рейтингӣ андешаҳои худро баён намуданд.

АКС: Бонки миллии Тоҷикистон