10 оилаи аз офати табиӣ зарардидаи деҳаи Баррӯшон соҳиби манзилҳои нав мешаванд

ДУШАНБЕ, 17.08.2026 /АМИТ «Ховар»/. Бо дастгирии Ҳукумати Ҷумҳурии Тоҷикистон 10 оилаи деҳаи Баррӯшони ноҳияи Рӯшон, ки дар натиҷаи офати табиӣ манзилҳои онҳо пурра вайрон гардидааст, соҳиби хонаҳои нав мешаванд.  Дар ин хусус ба АМИТ «Ховар» аз Мақомоти иҷроияи ҳокимияти давлатии Вилояти Мухтори Кӯхистони Бадахшон иттилоъ доданд.

Ба иттилои масъулин, дар айни замон сохтмони хонаҳо тибқи нақша идома дошта, дар муҳлатҳои муайянгардида ба анҷом расонида мешавад. Инчунин мумфаршсозии роҳи мошингард байни хонаҳо ва ободонию хуррамгардонии атрофи иншоот бо суръат идома дорад.

Ёдовар мешавем, ки 20 июл бар асари баланд шудани ҳарорати ҳаво ва об шудани барфу пиряхҳои баландкӯҳ дар деҳаи Баррӯшон сел ҷорӣ шуда, ба манзилҳои истиқоматии шаҳрвандон зарар расонид. Сел ҳамон рӯз дар деҳаи Деҳрӯшони Ҷамоати деҳоти Назаршоҳ Додихудоев низ ба хонаҳои истиқоматӣ, заминҳои кишоварзӣ, майдончаи варзишӣ, кӯчаҳо ва роҳравҳо хисорот ворид намуд.

Тибқи маълумот, дар деҳаи Баррӯшон 10 хона пурра, 6 хона қисман ва 14 хона зарари кам  дидааст. Дар деҳаи Деҳрӯшон 4 хона қисман ва 6 хона зарари кам  дидааст. Дар маҷмуъ, аз офати табиӣ 198 нафар зарар дидаанд.

АКС: Мақомоти иҷроияи ҳокимияти давлатии Вилояти Мухтори Кӯҳистони Бадахшон